फिलिपिन्सको एक विद्यालयमा गोली चल्दा दुइ विद्यार्थीसहित कम्तीमा तीन जनाको मृत्यु भएको छ। घटनामा अरु केही विद्यार्थी घाइते भएका छन्। घाइते भएकाहरुलाई अस्पताल लगिएको छ। मृतकमध्ये एक जना संदिग्ध बन्दुकधारी रहेको बताइएको छ। फिलिपिन्स राष्ट्रिय प्रहरीले घटनामा तीन जनाको मृत्यु भएको पुष्टि गरेको छ। स्थानीय समयअनुसार शुक्रबार दिउँसो करिब १:३० बजे मिन्डानाओको दक्षिण कोटाबाटो प्रान्तस्थित बांगा नेसनल हाईस्कुलमा गोली चलेको हो।
दक्षिण कोटाबाटोका गभर्नर रेनाल्डो तामायोले दुइ विद्यार्थीको मृत्यु भएको बताएका छन्। मृत्यु हुनेमा १४ वर्षीय एक छात्र र १४ वर्षीया एक छात्रा छन्। घटनाको कारणबारे तत्काल कुनै जानकारी सार्वजनिक गरिएको छैन। प्रहरीले घटनाबारे अनुसन्धान गरिरहेको जनाएको छ। घटनास्थलमा पुगेका प्रहरी अधिकारीहरूले तत्काल क्षेत्र सुरक्षित बनाउँदै विद्यालय प्रशासन र स्वास्थ्यकर्मीहरूसँग समन्वय गरि प्रभावित विद्यार्थी तथा कर्मचारीलाई सहयोग गरिरहेका छन्।
एएफपीले प्रमाणीकरण गरेको फेसबुकमा सार्वजनिक एउटा भिडियोमा एक पुरुषले विद्यालयबाट घाइते बालकलाई बोकेर बाहिर ल्याउँदै गरेको देखिन्छ। अर्को भिडियोमा स्थानीय भाषामा बोलिरहेकी एक शिक्षिकाले दुइ जना बन्दुकधारी रहेको बताएकी छन्। एक विद्यार्थीले भने उनीहरू बाहिरबाट आएका व्यक्ति भएको बताएका छन्। लगातार विद्यालयमा गोलीकाण्ड भइरहेका छन्। अगष्टमा फिलिपिन्सकै एक निजी विश्वविद्यालय परिसरमा एक हाईस्कुल विद्यार्थीले गोली चलाउँदा एक विद्यार्थीको मृत्यु भएको थियो भने दुइ जना घाइते भएका थिए। त्यसपछि बन्दुकधारीले आफैलाई गोली हानेका थिए। यसअघि जुनमा देशको पूर्वी क्षेत्रमा रहेको टाक्लोबान सहरमा भएको अर्को विद्यालय गोलीकाण्डमा तीन विद्यार्थीको मृत्यु भएको थियो र करिब २० जना घाइते भएका थिए।
