अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङले अमेरिका–चीन सम्बन्धमा सहकार्य अगाडि बढाउने प्रतिबद्धता व्यक्त गरेका छन्। ह्वाइट हाउसमा भएको कार्यक्रममा दुवै नेताले लिखित वक्तव्य प्रस्तुत गरेका थिए र सञ्चारकर्मीका प्रश्नहरूको सिधा उत्तर दिएका थिएनन्। ट्रम्पले अमेरिका र चीनबीच दीर्घकालीन र गहिरो सम्बन्ध रहेको स्मरण गराउँदै दोस्रो विश्वयुद्धको समयमा दुवै देशबीच भएको सहकार्यलाई औंल्याए। उहाँले आफू र सीले सहकार्यबाट ठूलो प्रगति हासिल गरेको दाबी गर्नुभयो। ट्रम्पले दोस्रो कार्यकालमा अमेरिका–चीन सम्बन्धमा देखिएका तनावको उल्लेख नगरी, बरु सीसँगको सम्बन्धलाई महान् मित्रता भनी व्याख्या गरे।
ट्रम्पका अनुसार दुवै देश अझ सन्तुलित व्यापारिक सम्बन्ध निर्माणतर्फ काम गरिरहेका छन्। उहाँले सुरक्षा, प्रविधि र कृत्रिम बुद्धिमत्ता (एआई) जस्ता विषयहरूमा पनि छलफल हुने जानकारी दिनुभयो। सीले पनि ट्रम्पसँग सहकार्य अघि बढाउने प्रतिबद्धता व्यक्त गर्दै भन्नुभयो, ‘हाम्रो मित्रतालाई निरन्तरता दिन, सहकार्य विस्तार गर्न र दुवै देशका जनताको कल्याण प्रवर्द्धन गर्न चाहन्छौँ।’ वर्तमान विश्वमा भइरहेको परिवर्तनको सन्दर्भमा अमेरिका र चीनले मानव विकास र प्रगतिलाई अघि बढाउने ऐतिहासिक जिम्मेवारी बहन गर्नुपर्ने उहाँको भनाइ छ। सीले कृत्रिम बुद्धिमत्ताको विकास मानव नियन्त्रणमा रहने र यसले जनताको कल्याणमा सेवा पुर्याउने सुनिश्चित गर्न अमेरिका र चीन दुवै इच्छुक रहेको समेत बताए। उनले आगामी पाँच वर्षमा करिव एकलाख अमेरिकी युवालाई चीन भ्रमण, आदानप्रदान र अध्ययनका लागि आमन्त्रण गर्ने योजना रहेको जानकारी पनि दिए। साथै, चीनले अमेरिकाको एटलान्टा चिडियाखानालाई थप दुई वटा पाण्डा उपलब्ध गराउने तयारीमा रहेको कुरा पनि उनले बताए।
सम्बन्धित खबर
