१४ असोज, काठमाडौं । पोखरा भ्रमणमा रहेको भुटान क्रिकेट टोलीमाथि घरेलु टोली गण्डकी प्रदेशले लगातार दोस्रो जित हात पारेको छ। पोखरा रंगशालास्थित क्रिकेट मैदानमा बुधबार सम्पन्न खेलमा गण्डकीले भुटानलाई ६४ रनले पराजित गर्यो। यसअघि मंगलबार भएको पहिलो अभ्यास मैचमा गण्डकीले भुटानलाई ८ विकेटले हानेको थियो। गण्डकीले दिएको १९७ रनको लक्ष्य पछ्याएको भुटान १७ ओभर ४ बलमा १३२ रनमा समेटियो। भुटानका लागि सोनाम चोपेलले सर्वाधिक ४३ रन बनाएपनि जितका लागि पर्याप्त भएन। ताशी दोर्जीले ३१, तेन्जिन राब्गेले २१, नामगाङ चोजेले ६, नाम्गे थिन्लेले १, रञ्जुङ मिक्यो दोर्जीले २, थिन्ले जम्त्सोले १७, ताशी चोपेलले ४ रन योगदान दिँदा गाकुल कुमार घाले र ताशी फुन्छोले कुनै रन बनाउन सकेनन्। सोनाम येशे एक रनमा अविजित रहे।
बलिङमा गण्डकीका कप्तान विपिन खत्रीले सर्वाधिक ४ विकेट लिए। उनले ३ ओभर ४ बलमा २२ रन खर्च गरे। दीपककुमार डुम्रेले ३, सिव्रिन श्रेष्ठले २ र सन्दीप खत्री क्षेत्रीले एक विकेट लिए। टस हारेर पहिला ब्याटिङ थालेको गण्डकीले निर्धारित २० ओभरमा ७ विकेट गुमाएर १९६ रन बनाए। गण्डकीका लागि सिव्रिन र करण पंगेनीले उत्कृष्ट साझेदारी गऱे। ४५ रनमा ४ विकेट गुमाएको अवस्थामा सिव्रिन र करणले ८८ रनको साझेदारी गरे। करणले २७ बलमा ४५ र सिव्रिनले २४ बलमा ४५ रन बनाए। सन्दीपले ९ बलमा अविजित ३० रन जोडे। अर्जुन कुमाल २, मुस्कान थापामगर २१, समीर कँडेल १, दीपक डुम्रे १९ र रोहित चन्द २० रनमा आउट भए भने अभिषेक थापा २ रनमा अविजित रहे। बलिङमा भुटानका थिन्ले जम्त्सोले सर्वाधिक ४ विकेट लिए। सोनाम येशेले २ र नाम्गे थिन्लेले १ विकेट लिए। टी-२० विश्वकपको उपक्षेत्रीय छनोटको तयारीका लागि नेपाल आएको भुटानले अब बिहीबार र शुक्रबार क्यान-११ सँग अभ्यास खेल खेल्नेछ।
