ललितपुरमा तिहार–छठको रौनकसँगै फूलको महोत्सव, ४५० भन्दा बढी प्रजातिका फूल एकै ठाउँमा

ललितपुर । तिहार र छठ पर्वको नजिकिँदै गर्दा ललितपुरमा फूलको महोत्सव सुरु भएको छ। फूलप्रेमी, व्यवसायी र सर्वसाधारणलाई लक्षित गर्दै बिहीबारदेखि १९औँ गोदावरी फूलको प्रतियोगितात्मक प्रदर्शनी २०८३ सुरु भएको हो। फ्लोरिकल्चर एसोसिएसन नेपाल (फ्यान) को आयोजनामा भएको पाँचदिने प्रदर्शनीमा स्वदेशमै उत्पादित गोदावरी फूलका विभिन्न जातसहित यस वर्ष भित्रिएका नयाँ प्रजातिका फूल र बिरुवा आकर्षणका रूपमा प्रस्तुत गरिएको छ। ‘रोपेर फूल गोदावरी, सजाऔँ घर आँगन वरिपरि’ भन्ने नारासहित आयोजित प्रदर्शनीमा ४५० भन्दा बढी प्रकारका फूल र बिरुवाको अवलोकन र खरिद गर्न सकिने व्यवस्था गरिएको छ। ८६ स्टलमा फूलको प्रदर्शनीमा कुल ८६ वटा स्टल राखिएका छन्। तीमध्ये ७८ वटा व्यावसायिक स्टल, एउटा प्लान्ट क्लिनिक, चारवटा अफिसियल स्टल, दुईवटा प्रतियोगितात्मक स्टल र एउटा फोटो सेल्फी स्टल रहेका छन्।

प्रदर्शनीमा सहभागी नर्सरी तथा पुष्प फार्महरूबीच गोदावरी फूलका पाँच विधामा प्रतिस्पर्धा गराइएको छ। मिनियचर, स्पाइडर, रिफ्लेक्स, इन्कर्भ र कट फ्लावर विधामा उत्कृष्ट फूल छनोट गरिनेछ। यसका अतिरिक्त उत्कृष्ट स्टल र यस वर्षदेखि थप गरिएको उत्कृष्ट पुष्प सजावट विधामा पनि प्रतिस्पर्धा हुनेछ। विजेताहरूलाई सिल्ड, नगद पुरस्कार र प्रमाणपत्र प्रदान गरिने आयोजकले जनाएको छ। पाँच दिनमा एक करोड ३० लाखको कारोबार हुने अपेक्षा गरिएको छ र आयोजकले पाँचदिने प्रदर्शनीमा ३९ हजारभन्दा बढी दर्शक सहभागी हुने अनुमान गरेका छन्। प्रदर्शनीमार्फत एक करोड ३० लाख रुपैयाँभन्दा बढीको व्यावसायिक कारोबार हुने अपेक्षा गरिएको छ। तिहार र छठ पर्वमा घर, आँगन, कार्यालय र सार्वजनिक स्थल सजाउन फूलको माग बढ्ने भएकाले प्रदर्शनीले स्वदेशी पुष्प व्यवसायको बजार विस्तारमा सहयोग पुग्ने विश्वास आयोजकको छ। विशेषगरी गोदावरी फूलको व्यावसायिक उत्पादन, नयाँ प्रजातिको प्रवर्द्धन र स्वदेशी नर्सरी व्यवसायीलाई उपभोक्तासँग प्रत्यक्ष जोड्ने उद्देश्यले प्रदर्शनी आयोजना गरिएको हो। फूलप्रेमीहरूले प्रदर्शनीमा विभिन्न रङ र आकारका गोदावरी फूलको अवलोकन गर्नुका साथै मनपरेका फूल र बिरुवा खरिद गर्न सक्नेछन्। पाँच दिनसम्म चल्ने प्रदर्शनीले चाडपर्वको रौनक बढाउनुका साथै नेपाली पुष्प व्यवसायको सम्भावना र बजार विस्तारलाई समेत उजागर गर्ने अपेक्षा गरिएको छ।