प्रकाशमानको प्रश्न- गणेशमानको परिवारको यस्तो अवस्था छ, गाउँमा बस्ने कार्यकर्ताको के होला?

१८ चैत, काठमाडौं। नेपाली कांग्रेसका पूर्व महामन्त्री प्रकाशमान सिंहले कांग्रेसको वर्तमान अवस्थाको मुख्य कारण विशेष महाधिवेशन भएको बताएका छन्। बुधबार निवर्तमान कार्यवाहक सभापति पूर्णबहादुर खड्काको नेतृत्वमा भएको छलफलमा नेता सिंहले यस्तो अभिव्यक्ति दिएका हुन्। उनले भने, “हामी भदौ २३ र २४ पछि पनि अलि अल्छी भयौं। कांग्रेस अहिलेको अवस्थामा आइपुग्नुको मुख्य कारण विशेष महाधिवेशन नै हो।”

विशेष महाधिवेशनबाट चयन भएको कार्यसमितिलाई आधिकारिकता दिइसकेपछि आफू पक्षका नेताले चुनावमा भाग नलिएको भए राम्रो हुने स्पष्ट पारेका छन्। उनले भने, “निर्वाचन आयोगको निर्णयपछि यस्तो निर्णय गर्ने, निर्वाचन आयोगले गरेको चुनाव लड्न हुँदैन भनेर मैले सभापति शेरबहादुर देउवालाई भनेको थिएँ। निर्वाचन आयोग निष्पक्ष नभएकाले चुनाव लड्नु गलत थियो।”

अहिले कांग्रेसको अवस्था दयनीय रहेको उनले औँल्याए। उनले भने, “देशमा लोकतन्त्र ल्याउने गणेशमान सिंहको परिवारको यति गरिब अवस्था छ भने जिल्लामा बस्ने कार्यकर्ताको के अवस्था होला?” भविष्यमा निर्णायक कदमहरू आफ्नो विचार समूहमा सामूहिक छलफल गरेर लिने परम्परा बसाल्न उनले खड्कासँग अनुरोध पनि गरे।