सम्पत्ति शुद्धीकरण अनुसन्धान विभागको अनुरोधमा नेपाल प्रहरीको केन्द्रीय अनुसन्धान ब्यूरो (सीआईबी)ले व्यवसायी दीपक भट्टलाई बिहीबार पक्राउ गरेको छ। भट्टमाथि बीमा ऐन २०७९ को दफा १४० उल्लंघन गरी करिब ३ अर्ब ८१ करोड रुपैयाँ बराबरको सेयर खरिदमा अनियमितता गरेको आरोप लागेको छ। जिल्ला अदालतले उनलाई १० दिन हिरासतमा राखेर अनुसन्धान गर्न अनुमति दिएको छ भने भट्टले आफू दोषी नभइ पीडित भएको दाबी गरेका छन्।
दीपक भट्टलाई बिहीबार जिल्ला अदालत काठमाडौंमा प्रस्तुत गर्दा अदालतले १० दिनको हिरासतमा राखेर अनुसन्धानको अनुमति प्रदान गरेको छ। भट्ट हिमालयन रिइन्स्योरेन्स कम्पनीका प्रमुख शेयरधनीमध्ये एक हुन् र नेपाल रिइन्स्योरेन्स कम्पनीका सेयर खरिदमा अनियमितता गरेको आरोपमा अनुसन्धान भइरहेको छ। विभागले नेपाल धितोपत्र बोर्ड र बीमा समितिलाई समेत छानबिनका लागि पत्राचार गरेको छ।
भट्टले हिमालयन रिइन्स्योरेन्सबाट २ अर्ब ७३ करोड ३३ लाख रुपैयाँ, सहायक कम्पनीबाट २२ करोड रुपैयाँ, नेपाल लाइफ इन्सुरेन्स तथा अन्य कम्पनीबाट थप रकम दुरुपयोग गरेको बताइएको छ। अदालतमा भट्टले आफूले कुनै अनियमितता नगरेको र आफ्नो नजिकका व्यक्तिहरुले आफ्नो टीएमएस प्रयोग गरी फरेब गरेको दाबी गरेका छन्। उनले धोकाधडी गर्नेहरूलाई पक्राउ नगर्नु र आफूमाथि मात्र अनुसन्धान सुरु हुनु अन्याय भएको बताएका छन्।
सम्बन्धित खबर
