ललितपुरमा महिला उद्यमीहरूले उत्पादन गरेका वस्तुहरूको बजार विस्तार र प्रवर्द्धनका लागि अन्तर्राष्ट्रिय महिला उद्यमी व्यापार मेला सुरु भएको छ। महिला उद्यमी महासंघ नेपालले २० चैतदेखि २२ चैतसम्म नवौँ संस्करणको मेला आयोजना गरेको छ र १४० वटा स्टलमा विभिन्न घरेलु, साना एवं मध्यम आकारका महिला उद्यमीहरूले भाग लिएका छन्। मेलाको उद्घाटन उपराष्ट्रपति रामसहाय प्रसाद यादवले गरेका थिए र नेपाल सरकारका विभिन्न मन्त्रालय तथा कूटनीतिक आयोगका प्रतिनिधिहरू उपस्थित थिए।
महिला उद्यमीहरूको प्रतिनिधित्व गर्ने एक मात्र छाता संस्था महिला उद्यमी महासंघ नेपालले शुक्रबारदेखि नवौं संस्करणको मेला सञ्चालन गरेको हो। मेलाबाट देशका विभिन्न जिल्ला तथा ग्रामीण क्षेत्रका महिला उद्यमहरूको पहिचान, प्रोत्साहन र उत्साह अभिवृद्धि गर्ने लक्ष्य राखेको महासंघले जनाएको छ। महिला उद्यमीहरूलाई राष्ट्रिय तथा अन्तर्राष्ट्रिय बजारसँग जोड्दै बजार पहुँच विस्तार गर्न मेलाले मद्दत पुर्याउने महासंघको भनाइ छ।
‘महिला उद्यमी, ठूला खरिदकर्ता, लगानीकर्ता तथा निजी क्षेत्रबीच बीटूबी नेटवर्किङ र व्यापारिक सहकार्य बढाउन यो मेला महत्वपूर्ण छ’ महासंघले विज्ञप्तिमा जनाएको छ। २२ चैतसम्म सञ्चालन हुने यस मेलामा नेपालका विभिन्न जिल्लाका घरेलु, साना तथा मध्यम आकारका महिला उद्यमी, व्यवसायी एवं निर्यातकर्ताहरूको सहभागिता रहेको महासंघ अध्यक्ष दर्शना श्रेष्ठले जानकारी दिइन्।
मेलामा १४० वटा स्टलहरू रहेका छन्। प्राकृतिक रेशमजन्य वस्तु, ढाका सामग्री, गलैंचा, हाते कागजका सामान, जैविक खाद्य पदार्थ, स्वदेशी रैथाने खानेकुराका परिकार, कृषिजन्य उत्पादन, जडिबुटीका सामग्री, विभिन्न मूर्ति, गरगहनाहरू तथा सजावटका सामानहरू मेलामा राखिएका छन्। मेलाको प्रमुख अतिथि उपराष्ट्रपति रामसहाय प्रसाद यादव थिए। मेलाको उद्घाटन समारोहमा नेपाल सरकारका विभिन्न मन्त्रालय, विभाग तथा कार्यालयका प्रमुखहरु र प्रतिनिधिहरू, साथै कूटनीतिक आयोगका नेतृत्व र प्रतिनिधिहरूले सहभागिता जनाएका थिए।
