तेल उत्पादन गर्ने मुलुकहरूको समूह ओपेक प्लसले मे महिनामा दैनिक दुई लाख ६ हजार ब्यारेल तेल उत्पादन बढाउने निर्णय गरेको छ। मध्यपूर्वमा जारी द्वन्द्वका कारण विश्वव्यापी इन्धन आपूर्ति प्रभावित हुनुका बीच यो निर्णय सार्वजनिक गरिएको हो। साउदी अरब, रुस, इराक, संयुक्त अरब इमिरेट्स, कुवेत, काजाकस्तान, अल्जेरिया र ओमानका प्रतिनिधिहरूको भर्चुअल बैठकपछि यो घोषणा गरिएको छ।
मध्यपूर्वमा जारी सैनिक द्वन्द्वका बीच ती आठ देशहरूले ऊर्जा आपूर्तिको निरन्तरता सुनिश्चित गर्न अन्तर्राष्ट्रिय समुद्री मार्गहरूको सुरक्षामा जोड दिएका छन्। उनीहरूले ऊर्जा पूर्वाधारमाथि आक्रमणको विषयमा चिन्ता व्यक्त गर्दै, क्षतिग्रस्त ऊर्जा संरचनाहरूको पुन:स्थापनाको महँगो र समयलाग्ने प्रक्रिया रहेको बताएका छन्। ओपेक प्लसले आगामी निर्णयका लागि मे ३ मा पुन: बैठक बस्ने तालिका तय गरेको छ।
ओपेक १९६० मा स्थापना भएको तेल उत्पादक देशहरूको संगठन हो, जसका मुख्य सदस्यहरूमा साउदी अरब, इराक, इरान, कुवेत, भेनेजुएला लगायतका देशहरू पर्दछन्। ओपेक बाहेकका केही ठूला तेल उत्पादक देशहरू जस्तै रुस र काजाकस्तान पनि यस समूहमा जोडिएका छन्, जसकारण यसलाई ‘ओपेक प्लस’ भनिन्छ। यी देशहरूले तेल उत्पादन नीतिहरू तयार पार्ने, सदस्य राष्ट्रहरूको हित संरक्षण गर्ने र विश्व बजारमा पेट्रोलियम पदार्थहरूको मूल्य निर्धारणमा महत्त्वपूर्ण भूमिका खेल्छन्।
फेब्रुअरी २८ देखि अमेरिका र इजरायलले इरानमाथि गरेको आक्रमणपछि मध्यपूर्वमा द्वन्द्व तीव्र बनेको छ, जसले कच्चा तेल र प्रशोधित पेट्रोलियम पदार्थहरूको आपूर्तिमा उल्लेखनीय कमी ल्याएको छ र यसले विश्व आर्थिक अवस्था प्रतिकूल प्रभाव पारेको छ।
