इरानले पाकिस्तानमार्फत अमेरिका समक्ष युद्ध ‘सधैंका लागि अन्त्य गर्ने’ प्रस्ताव राख्यो
इरानले अमेरिका र इजरायलसँग जारी युद्धलाई सधैंका लागि अन्त्य गर्ने उद्देश्यसहित पाकिस्तानमार्फत शान्ति प्रस्ताव अघि सारेको छ। इरानले अमेरिकी १५ बुँदे प्रस्ताव अस्वीकार गर्दै आफ्ना सर्तहरूमा आधारित दीर्घकालीन समाधान आवश्यक रहेको जनाएको छ। तेहरानले क्षेत्रीय द्वन्द्व अन्त्य, स्ट्रेट अफ होर्मुजमा सुरक्षित आवागमन, पुनर्निर्माण र प्रतिबन्धहरू हटाउने मागहरू समेटिएको शान्ति सन्देश प्रस्तुत गरेको छ।
अमेरिकाबाट आएको १५ बुँदे प्रस्तावलाई करिब दुई हप्तासम्म गहिरो समीक्षा गरेपछि इरानी नेतृत्वले पाकिस्तानमार्फत आफ्नो शान्ति प्रस्ताव अघि सारेको जानकारी प्राप्त भएको छ। अमेरिकी राष्ट्रपति डोनाल्ड ट्रम्पले समुद्री मार्ग स्ट्रेट अफ होर्मुज खुला गर्न इरानलाई मंगलबारसम्मको समयसीमा दिएको थिए। यदि स्ट्रेट अफ होर्मुज खुला नगरेमा इरानका विद्युत केन्द्र र पुलहरूलाई निशाना बनाउने चेतावनी समेत ट्रम्पले दिएका थिए।
मंगलबारसम्मको म्याद सकिनुभन्दा एक दिन अघि इरानले युद्धलाई सधैंका लागि अन्त्य गर्ने शान्ति सन्देश दिएको हो। अप्रिल ६ मा इरानका विदेश मन्त्रालयका प्रवक्ता इस्माइल बगाईले मध्यस्थमार्फत सन्देशहरूको आदान–प्रदान भएको पुष्टि गरेका थिए। तर उनले तेहरानले अमेरिकाको १५ बुँदे योजना अस्वीकार गरेको समेत बताएका थिए।
आई.आर.एन.एको अनुसार, इरानको १० अनुच्छेदको जवाफमा युद्धविरामको अवधारणालाई ‘विगतका अनुभवहरू’का आधारमा अस्वीकार गरिएको छ। यसको सट्टा इरानले आफ्ना सर्तहरूमा आधारित दीर्घकालीन समाधान आवश्यक रहेकोमा जोड दिएको छ। एजेन्सीका अनुसार तेहरानले प्रस्तुत गरेको शान्ति सन्देशको कागजातमा क्षेत्रीय द्वन्द्वको अन्त्य, स्ट्रेट अफ होर्मुजमार्फत सुरक्षित आवागमन सुनिश्चितता, पुनर्निर्माण र प्रतिबन्धहरू हटाउने व्यवस्था लगायतका विभिन्न मागहरू उल्लेख छन्।
