प्रहरी महानिरीक्षक दानबहादुर कार्कीले नागरिकको अपेक्षाअनुसार सेवा प्रवाहलाई उच्च प्राथमिकतामा राख्न निर्देशन दिनुभएको छ। कार्कीले बिचौलियाहरूलाई कानुनी दायरामा ल्याउन र छिटो छरितो सेवा प्रवाह गर्न प्रहरीलाई निर्देशन दिनुभएको छ। प्रहरीले सीमा नाकामा आपराधिक गतिविधि नियन्त्रण र प्राकृतिक स्रोत दोहनमा संलग्न व्यक्तिलाई कानुनी कारबाही गर्न निर्देशन पाएको छ। २५ चैत, काठमाडौं।
प्रहरी महानिरीक्षक (आईजीपी) दानबहादुर कार्कीले नागरिकको अपेक्षालाई प्राथमिकतामा राखेर काम गर्न निर्देशन दिनुभएको छ। ‘नागरिकलाई केन्द्रबिन्दुमा राखेर उनीहरूको समस्या र गुनासोको उचित सम्बोधनका साथै नागरिकको अपेक्षा अनुसार सेवा प्रवाहलाई उच्च प्राथमिकतामा राखेर कार्यसम्पादन गर्नुहोस्’ आईजीपी कार्कीले भन्नुभयो। नेपाल प्रहरी प्रधान कार्यालयबाट भर्चुअल माध्यमले बुधबार प्रहरी कर्मचारीहरूलाई समसामयिक विषयवस्तुमा निर्देशन सम्बोधन गर्दै उहाँले उक्त कुरा भन्नुभएको हो।
कार्कीले प्रहरी कार्यालयहरूमा आउने सेवाग्राहीहरूलाई छिटो र छरितो सेवा दिन प्रभाव पारी वा प्रलोभन देखाउने जस्ता गतिविधिमा संलग्न बिचौलियाहरूसँग तत्काल कानुनी दायरामा ल्याउन निर्देशन दिनुभएको छ। उहाँले बिचौलिया रहित, कानुनसम्मत, पारदर्शी र छरितो प्रभावकारी सेवा प्रवाह गर्नुपर्ने पनि भन्नुभयो। प्रत्येक प्रहरी कार्यालयले नागरिकलाई सहजकर्ताको व्यवस्था गरी सेवाग्राहीलाई सरल र सहज रुपमा प्रहरी सेवा प्रदान गर्नुपर्ने र भएका प्रगति विवरणहरू सेवा लिन आउनेहरूलाई एसएमएसमार्फत जानकारी गराउन निर्देशन पनि दिनुभयो।
शून्य सहनशीलताको नीति अनुरूप प्रचलित कानुनद्वारा निर्देशित विधि र पद्धतिलाई पालना गर्दै निष्पक्ष, पारदर्शी र गुनासोमुक्त सेवा प्रवाह गर्न सबै प्रहरी कर्मचारीहरूले सदैव कटिबद्ध हुनुपर्नेमा उहाँले जोड दिनुभयो। बस्तुनिष्ठ अपराध अनुसन्धानमा विशेष जोड दिँदै कार्कीले सीमा नाकामा हुने आपराधिक गतिविधि, गुण्डागर्दी, तस्करी नियन्त्रण र प्राकृतिक स्रोतको दोहनजस्ता गतिविधिमा संलग्न व्यक्तिलाई कानुनी दायरामा ल्याउन प्रहरी कर्मचारीहरूले कटिबद्ध भएर काम गर्न निर्देशन दिनुभएको छ।
