राष्ट्रिय खेल भलिबल: उत्साह र चुनौतीको मिश्रण

नेपालले २०८२ सालमा सीमित मात्रामा अन्तर्राष्ट्रिय भलिबल प्रतियोगितामा सहभागिता जनाएको थियो। नेपाल पुलिस क्लबले काभा महिला क्लब भलिबलमा तेस्रो स्थान हासिल गरेको थियो भने हेल्प नेपालले काभा पुरुष क्लब भलिबलमा कांस्य पदक जितेको थियो। ३० चैत, काठमाडौं। भलिबल नेपालको राष्ट्रिय खेल हो। धेरैलाई यो कुरा थाहा छ भने केहीलाई थाहा छैन पनि। राष्ट्रिय खेलको रूपमा घोषणा भएको झण्डै एक दशकसम्म पुगेको भए पनि भलिबलले आफ्नो राष्ट्रिय खेलको पहिचानलाई गर्विलो बनाउन खास प्रगति गर्न सकेको छैन। त्यसैले २०८२ सालमा पनि भलिबलका लागि विशेष गरी ‘वाउ’ गर्ने जस्तो केही भएन, तर कोर्टमा भने भलिबल सक्रिय रह्यो। अन्तर्राष्ट्रिय स्तरमा सीमित सहभागिता र प्रतियोगितामा मात्रै खेल हुँदा पनि घरेलु प्रतिस्पर्धा भने लगातार भइरहे। नेपाल भलिबल संघले आयोजना गर्ने नवौं एनभीए भलिबल च्याम्पियनसिप, फ्रेञ्चाइज महिला भलिबल लिग (इडब्लुभीएल) पोखरामा हुने चर्चित भलिबल प्रतियोगिता टाइगर कप लगायतका राष्ट्रिय स्तरका प्रतियोगिताहरू सम्पन्न भए। नवौं एनभीए च्याम्पियनसिपबाट छनोट भएका उत्कृष्ट ८ पुरुष र ६ महिला टोलीले प्रतिस्पर्धा गर्ने पीएम कप एनभीए लिग चैत २०८२ मा गर्ने भनिए पनि प्राविधिक कारणवश यो प्रतियोगिता वैशाख २०८३ मा सरेको छ।

२०८२ मा नेपालले धेरै अन्तर्राष्ट्रिय प्रतियोगितामा भाग लिन सकेन। नेपालको अन्तर्राष्ट्रिय सहभागिता मुख्यतया सेन्ट्रल एसियन भलिबल एसोसिएसन (काभा) द्वारा आयोजना गरिएका प्रतियोगितामा सीमित रह्यो। यस वर्ष असोजमा नेपालको पुरुष टोलीले बंगलादेशको ढाकामा भएको काभा पुरुष भलिबल कप प्रतियोगितामा सहभागिता जनाएको थियो। अक्टोबर २२ देखि २८ सम्म चल्ने उक्त प्रतियोगितामा नेपाल ६ टोलीमध्ये पाँचौं स्थानमा टुंगियो। नयाँ खेलाडी समावेश गरी बनाइएको टोलीले अन्तर्राष्ट्रिय खेल अनुभवमा कमजोरी देखायो। यस्तै, माघमा नेपाल पुलिस क्लबले माल्दिभ्समा भएको काभा महिला क्लब भलिबलमा सहभागिता जनायो। साविक विजेता भएको नेपाल पुलिस क्लब यस पटक फाइनल पुग्न सकेन। सेमिफाइनलमा पराजित भएपछि तेस्रो स्थानको खेलमा श्रीलंकन क्लबलाई हराउँदै नेपाल पुलिस क्लब तेस्रो भयो। साउनमा माल्दिभ्समै भएको काभा पुरुष क्लब भलिबलमा नेपालको हेल्प नेपालले पनि तेस्रो स्थान हासिल गर्दै कांस्य पदक जितेको थियो। ६ क्लब सहभागी उक्त प्रतियोगितामा हेल्प नेपालले ४ खेल जित्यो र १ खेलमा हार्यो। तर सेट रेसियोमा पछि परेपछि फाइनल पुग्न सकेन। नेपाल भलिबल संघका अध्यक्ष जितेन्द्र बहादुर चन्दले विदेशी भूमिमा नेपालको कुनै पनि भलिबल टोलीले जितेको यो दोस्रो पदक भएको जानकारी दिए। पूर्वमा सन् २०१७ मा नेपालको पुरुष राष्ट्रिय टोलीले माल्दिभ्समा भएको काभा सेन्ट्रल जोन प्रतियोगितामा कांस्य पदक हात पारेको थियो।