सातदोबाटोस्थित अन्तर्राष्ट्रिय खेलकुद परिसर हातामा रहेको आउटडोर पौडी पोखरी बुधबारदेखि सर्वसाधारणका लागि सञ्चालनमा आएको छ। राष्ट्रिय खेलकुद परिषद् (राखेप) अन्तर्गत प्रशासन विभागका प्रमुख भोजानन्द राईले पूजाअर्चना गरी पौडी पोखरी सञ्चालनमा ल्याएका हुन्। सो अवसरमा आपूर्ति तथा भण्डार शाखाका प्रमुख देवराज कटवाल, अन्तर्राष्ट्रिय खेलकुद परिसरका प्रमुख लीलाराम बस्नेत लगायतको पनि उपस्थिति थियो।
पौडी पोखरी दैनिक तीन सिफ्टमा सञ्चालन हुनेछ जुन सिफ्टहरू १०–१२ बजे, १–३ बजे र ४–७ बजेसम्म संचालन हुनेछन्। पहिलो तथा दोस्रो सिफ्टका लागि २०० रुपैयाँ र तेस्रो सिफ्टका लागि २५० रुपैयाँ शुल्क तोकिएको छ। त्यस्तै, ज्येष्ठ नागरिक र फरक क्षमता भएका व्यक्तिहरूका लागि विशेष छुटको व्यवस्था पनि गरिएको छ।
जाडोयाममा नियमित बन्द हुने यो आउटडोर पोखरी असोज १० गतेदेखि बन्द गरिएको थियो। तर, आउटडोर पोखरीको छेउमा रहेको हिटिङ सिस्टमयुक्त पौडी पोखरी भने नियमित रूपमा सञ्चालन हुँदै आएको छ।
