इरानसँग जारी तनावका बीच अमेरिकी नौसेनाका मन्त्री जोन सी. फेलान हटाइएका छन्

अमेरिकी नौसेनाका मन्त्री जोन सी. फेलान इरानसँग जारी तनावका बीच तत्काल लागू हुने गरी जिम्मेवारीबाट हटाइएका छन्। फेलानको स्थानमा २५ वर्ष नौसेनामा अनुभव भएका हुंग काओले कार्यवाहक मन्त्रीको जिम्मेवारी सम्हालेका छन्। ट्रम्प प्रशासनबाट उच्च तहका सैन्य नेतृत्वकर्ताहरू हटाइने क्रम इरानी नाकाबन्दी र स्ट्रेट अफ होर्मुजमा जारी झडपसँग सम्बन्धित छ।

१० वैशाख, काठमाडौं। पेन्टागनले फेलानको जिम्मेवारीबाट हटाइएका बारेमा जानकारी दिँदै भनेको छ कि फेलानले विभाग र संयुक्त राज्य अमेरिकाको नौसेनामा पुर्‍याएको योगदानका लागि आभारी छन्। पेन्टागन सचिव सिन पार्नेलले भनेका छन्, ‘हामी उहाँको आगामी यात्राका लागि शुभकामना दिन्छौं।’ फेलान ट्रम्प प्रशासन अन्तर्गत हटाइएका उच्च तहका सैन्य नेताहरु मध्य एक हुन्।

नौसेनाले फेलानको बहिर्गमनको कारण सार्वजनिक गरेको छैन। यो घटनाक्रम केही साताअघि अमेरिकी रक्षा सचिव पिट हेगसेथले सेनाका प्रमुख र्‍यान्डी जर्जलाई पनि पदबाट हट्न आग्रह गरेको समयमा आएको हो। पेन्टागनमा पुगेयता हेगसेथले नौसेनाको सञ्चालन प्रमुख तथा वायुसेनाका अधिकारीसहित एक दर्जनभन्दा बढी वरिष्ठ सैन्य अधिकारीहरूलाइ हटाइसकेका छन्।

फेलान पहिला सैन्य सेवामा नभएका व्यक्ति हुन्, तर सन् २०२४ मा राष्ट्रपति डोनाल्ड ट्रम्पले उनलाई नौसेना मन्त्रीमा नियुक्त गरेका थिए। नौसेनाको कार्यवाहक मन्त्री बनेका हुंग काओ २०२४ मा भर्जिनियाबाट अमेरिकी सिनेटका लागि उम्मेदवारी दिएका थिए। ह्वाइट हाउसकी प्रेस सचिव क्यारोलिन लेभिटले राष्ट्रपति ट्रम्प इरानी बन्दरगाहहरूमा जारी अमेरिकी नौसैनिक नाकाबन्दीप्रति ‘सन्तुष्ट’ रहेको बताएकी छन्।