सशस्त्र प्रहरीले सीमा नाकामा घरायसी सामग्रीमा समेत सय रुपैयाँभन्दा बढी मूल्य भएमा भन्सार तिर्नुपर्ने कडाइ गरेको छ। सीमावर्ती नागरिकहरूले नयाँ भन्सार नीतिप्रति विरोध जनाउँदै सामाजिक सञ्जालमा आक्रोश देखाएका छन्। पूर्वमन्त्री महन्थ ठाकुरले संसदमा सरकारविरुद्ध विद्रोहको चेतावनी दिएका छन् र नीति सच्याउन माग गरेका छन्।
सशस्त्र प्रहरीले बुर्का लगाएकी एक महिलाको हातबाट झोला खोस्छन्। झोलामा घरायसी उपभोग्य सामग्री हुन्छन्। सशस्त्र प्रहरीको कडाइबाट रिसाएकी एक महिला केही प्याकेट चाउचाउ र कुरकुरे भुइँमा फाल्छिन्। त्यो सामग्री बच्चालाई ल्याइदिएको उनी बताउँछन्। चेकचाँजबाट झर्किएर एक वृद्ध मोटरसाइकलमा झुण्ड्याएर ल्याएको केही कोसा केरा कुल्चेर नष्ट गर्छन्। र, केरा प्रहरीले डस्बिनमा फाल्छन्। भन्सार नाकाहरूमा भारतबाट सर्वसाधारणले सामान किनेर ल्याउँदा एक सय रुपैयाँभन्दा बढी मूल्य भयो भने अनिवार्य भन्सार तिर्नुपर्ने प्रावधानमा कडाइ गरिएपछि नागरिकले प्रतिवाद गरिरहेको भाइरल दृष्यहरू हुन्।
नयाँ सरकारसँगै फेरिएको भन्सार र सुरक्षा नीतिप्रति नागरिकले असन्तुष्टि जनाएका यस्ता दृष्यहरू अहिले सामाजिक सञ्जालहरूमा भाइरल छन्। फेसबुक, टिकटक, रिल्सजस्ता सञ्जालमा पोष्ट नगरिए पनि सीमावर्ती क्षेत्रका मानिसहरूको आक्रोश अझ चर्किएको छ। घरायसी प्रयोगकै सामग्रीमा भन्सार लगाउने गरी सशस्त्र प्रहरीले कडाइ गर्न थालेपछि प्रतिवाद बढ्दै गएको छ। धनुषाको जटही नाकामा शुक्रबार भेटिएका रामकला देवीले भनिन्, ‘वारीपारी नाता आफन्त छन्, सित्तैमा लिनेदिने साना घरायसी कुरामै पनि कर तिर्ने पैसा कहाँबाट ल्याउने?’
पूर्वमन्त्री हृदयेश त्रिपाठी भन्छन्, ‘काठमाडौं बसेका तर यहाँ (सीमा क्षेत्र)को अवस्था नबुझेकाहरूमा फेरि भूत (राजस्व संकलन बढाउने) चढेको देखियो। यस्तो भूत विगतमा बेलाबेला देखिन्थ्यो।’ सय रुपैयाँ माथिका सामग्रीमा भन्सार उठाउने नीतिले सीमावर्ती जनतालाई अपमान गर्ने उनको बुझाइ छ। ‘भान्सामा प्रयोग हुने साग तरकारीको मूल्य सय रुपैयाँ हुन्छ, टुथपेस्ट आउँदैन,’ त्रिपाठी भन्छन्, ‘यो सरकारले पनि अव्यवहारिक नीतिलाई बुझ्न सकेन।’
