सिरहा नगरपालिका वडा नं. २ अन्तर्गत लक्ष्मीचोक क्षेत्रमा सामान्य वर्षामै पानी जम्दा स्थानीयको दैनिक जीवन प्रभावित भएको छ। सडक डिभिजन कार्यालय लहानका इन्जिनियर अस्विन यादवले बताए अनुसार सडकको उचाइ कम र नालाको उचाइ बढी भएकाले पानी सडकमै जम्ने समस्या देखिएको छ। करोडौँ रुपैयाँ खर्चेर नाला निर्माण गरिए पनि पानी निकासमा समस्या देखिएको कारण स्थानीयले दीर्घकालीन समाधानको माग गरेका छन्। १४ वैशाख, सिरहा।
सामान्य वर्षामै सिरहा नगरपालिका वडा नं. २ अन्तर्गत लक्ष्मीचोक क्षेत्र जलमग्न हुँदा स्थानीयहरूको दैनिकीमा बाधा देखिएको छ। चोहर्वा–सिरहा सडकखण्डअन्तर्गत पर्ने उक्त क्षेत्रमा हिजो रातिदेखि आज बिहानसम्म परेको वर्षाकाले सडकमा पानी जमेको थियो। जल तथा मौसम विज्ञान विभागका अनुसार २४ घण्टाको अवधिमा सिरहा नगरक्षेत्रमा २९.२ मिलिमिटर मात्र वर्षा भएको थियो। सो वर्षाबाट लक्ष्मीचोक अगाडिको माडर जाने बाटोमा पानी जमेर सवारी आवागमन केही समयका लागि अवरुद्ध भएको थियो। पानीको निकास नहुँदा स्थानीयवासीहरूले आफैं कोदालो मारेर अस्थायी नाला जस्तो बनाएर पानी निकास गरेका थिए।
स्थानीय राजकिशोर साह बनियाँका अनुसार नाला निर्माण हुँदा पानी निकास सहज हुने आशा गरिएका थिए। ‘पहिलेभन्दा समस्या झन् बढेको छ, सामान्य वर्षामै घर अगाडि पानी जम्छ, बाहिर निस्कनै गाह्रो हुन्छ,’ उनले भने। उनको भनाइ अनुसार यसले विद्यार्थीलाई विद्यालय जान समेत गाह्रो बनाएको छ। अर्का स्थानीय ललित साहले भने, सडकमै पानी जम्दा दैनिक जीवन निकै असहज भएको बताए। “उपयुक्त निकास नभएका कारण पानी सडकमै थुप्रिन्छ, मजदुर, व्यापारी र विद्यार्थी सबै प्रभावित हुनुपरेको छ,” उनले भने।
वडा नं. २ का अध्यक्ष राकेश यादवले समस्या समाधानका लागि पटक–पटक निर्माण व्यवसायी र सडक डिभिजन कार्यालय लहानलाई जानकारी गराए पनि बेवास्ता भएको गुनासो गरेका छन्। ‘जनताले गुनासो गर्छन्, तर सम्बन्धित निकायले ध्यान दिँदैनन्,’ उनले भने। त्यही अनुसार सडक डिभिजन कार्यालय लहानका इन्जिनियर अस्विन यादवले नालाको उचाइ बढी र सडकको उचाइ कम भएकाले पानी नालामा जान नसकी सडकमै जम्ने समस्या देखिएको बताए। स्थानीयले समस्या उठाएपछि सडक स्तरोन्नतिको पहल भइरहेको उनले जनाए। ‘तत्कालका लागि नालामा सामान्य अवरोध हटाएर पानी निकास गर्न स्थानीयलाई आग्रह गरिएको छ,’ उनले भने।
आर्थिक वर्ष ०८१/८२ मा सडक डिभिजन कार्यालय लहानले करिब ८ करोड रुपैयाँ खर्च हुने ठेक्का आह्वान गरेको थियो। जसअन्तर्गत पहिलो चरणमा भगवत ग्रुप कन्स्ट्रक्सन, काठमाडौंले ६ करोड रुपैयाँमा १,१०० मिटर नाला निर्माणको ठेक्का पाएको थियो भने दोस्रो चरणमा बोहदर माई एबी–वीरगञ्जले २ करोड रुपैयाँमा ५०० मिटर नाला निर्माणको जिम्मा पाएको थियो। दुवै निर्माण कम्पनीले काम सम्पन्न गरी भुक्तानी समेत लिइसकेको इन्जिनियर यादवले जानकारी दिए। तर करोडौं रुपैयाँ खर्ची गरी बनेको संरचनाले राहत दिने सट्टा थप समस्या निम्त्याएपछि स्थानीय आक्रोशित भएका छन्। उनीहरूले दीर्घकालीन समाधानसहित तत्काल सुधारका लागि सम्बन्धित निकायसँग माग राखेका छन्।
