पुराना साडीलाई पुनः प्रयोग गरेर छोरीका लागि लहँगा, फ्रक, कुर्ता सुरुवाल र स्कर्ट टपजस्ता आकर्षक पहिरन तयार गर्न सकिन्छ। साडी त्यस्तो पहिरन हो जुन प्रत्येक नेपाली महिलासँग प्रायः हुन्छ। विशेष गरी विवाह, ब्रतबन्ध, दशैं–तिहार लगायतका विशेष अवसरमा लगाइने सिल्क, बनारसी, पट्टु वा जर्जेट जस्ता साडीहरू धेरै महिलाले वर्षौंसम्म सुरक्षित राख्छन्। यी साडीको कपडा उच्च गुणस्तरको हुनेकाले राम्रोसँग राखेमा दशकौंसम्म टिक्न सक्छ। तर एउटै साडी बारम्बार लगाउँदा दिक्क लाग्न सक्छ र कहिलेकाहीं फेसन पनि पुरानो हुनसक्छ। यस्तो अवस्थामा पुराना साडीलाई फाल्नु वा त्यहाँ थन्क्याउनुको सट्टा नयाँ तरिकाले रिसाइकल गरेर प्रयोग गर्न सकिन्छ। विशेष गरी छोरी वा घरका साना बच्चाहरूका लागि विभिन्न आकर्षक पहिरन तयार गर्न सकिन्छ। यसले पुरानो साडीलाई नयाँ जीवन दिन्छ, खर्च बचत गर्छ, पर्यावरण संरक्षणमा सहयोग गर्छ र सबैभन्दा महत्वपूर्ण कुरा बच्चीलाई आमाको माया र स्नेहको स्पर्श दिन्छ।
पुराना साडीबाट बच्चाको पहिरन बनाउनाले हुने फाइदा पनि धेरै छन्। साडीमा आमाको विवाह, विशेष समारोह वा स्मरणीय क्षणहरू समाहित हुन्छन्। त्यही कपडाबाट बनेको लहँगा वा फ्रक लगाउँदा छोरीलाई आमासँग जोडिएको अनुभूति हुन्छ। पुराना साडीबाट नयाँ ड्रेस बनाउँदा आर्थिक बचत हुन्छ किनकी नयाँ कपडा किन्नु पर्दैन। एउटै साडीबाट २–३ वटा बच्चाका पहिरन तयार गर्न सकिन्छ। यसले पर्यावरणमैत्री प्रभाव पार्छ किनकी कपडा फाल्दा हुने प्रदूषण कम हुन्छ र टेक्सटाइल वेस्ट घट्छ। छोरीको उमेर, रंग रुचि र आकार अनुसार डिजाईन गर्न सकिन्छ। जरी, बोर्डर वा पल्लुको सुन्दर भाग प्रयोग गरेर प्रिमियम लुक दिने सकिन्छ। सिल्क वा गुणस्तरीय कपडा भएकाले बच्चाको पहिरन पनि लामो समय टिक्छ र धुँदा राम्रो रहन्छ।
पुराना साडीबाट बनाउन सकिने केही लोकप्रिय र आकर्षक डिजाईनहरूमा लहँगा चोली, फ्रक, कुर्ता सुरुवाल र स्कर्ट टप समावेश छन्। लहँगा चोलीमा साडीको पल्लुको भागलाई मुख्य स्कर्टको रूपमा प्रयोग गर्नुपर्छ। तल्लो भागमा फ्लेयर दिन अतिरिक्त कपडा जोड्न सकिन्छ। फ्रकका लागि साडीका विभिन्न भाग जोडेर फूल फ्रक वा अनारकली गाउन बनाउन सकिन्छ। कुर्ता सुरुवालका लागि साडीको पल्लु वा जिउको भागबाट लामो कुर्ता तयार गर्न सकिन्छ। स्कर्ट टप बनाउन साडीको पल्लु वा जिउको भागलाई ए-लाइन र सर्कुलर स्कर्टमा रूपान्तरण गर्न सकिन्छ।
सम्बन्धित खबर
