ट्रम्पले रक्षा खर्च ४० प्रतिशतले वृद्धि गर्दै सामाजिक सुरक्षामा ठूलो कटौती गरेका छन्

अमेरिकी राष्ट्रपति डोनाल्ड ट्रम्पले आगामी आर्थिक वर्षका लागि १५ खर्ब अमेरिकी डलरको सैन्य बजेट प्रस्ताव गरेका छन्। ट्रम्पले घरेलु कार्यक्रमहरूमा ७३ अर्ब डलर कटौती गर्दै मेडिकेड र मेडिकेयर देशका राज्य सरकारहरूको जिम्मामा सार्न खोजेका छन्। बजेटले आन्तरिक सुरक्षा विभाग र आईसीईका लागि ठूलो रकम विनियोजन गर्दै सामूहिक राष्ट्रनिकाला अभियानलाई प्राथमिकता दिएको छ।

१५ वैशाख, काठमाडौं। अमेरिकी राष्ट्रपति डोनाल्ड ट्रम्पले आगामी आर्थिक वर्षका लागि १५ खर्ब (१.५ ट्रिलियन) अमेरिकी डलरको विशाल सैन्य बजेट प्रस्ताव गरेका छन्। शुक्रबार सार्वजनिक गरिएको यो वार्षिक बजेट प्रस्तावले गत वर्षको तुलनामा रक्षा खर्चमा लगभग ४० प्रतिशतको ऐतिहासिक वृद्धि गरेको छ। ह्वाइट हाउसले यस बजेटमार्फत ‘शक्तिमार्फत शान्ति’ (पीस थ्रु स्ट्रेन्थ) को आफ्नो मूल मन्त्रलाई पुनः पुष्टि गर्दै सैन्य शक्ति र कानुन कार्यान्वयनलाई उच्च प्राथमिकतामा राखेको छ।

ट्रम्पको सन् २०२७ को यो बजेट प्रस्तावले सन् २०२६ को तुलनामा रक्षा खर्चमा मात्र ४५५ अर्ब डलरको वृद्धि गर्ने लक्ष्य राखेको छ। अफिस अफ म्यानेजमेन्ट एण्ड बजेट (ओएमबी) का निर्देशक रसेल भाउटले प्रस्तावनामा लेखेका छन्, ‘२०२७ को बजेटले गैर-रक्षा खर्च नियन्त्रण गर्दै संघीय सरकारमा सुधार गर्ने राष्ट्रपतिको परिकल्पना अगाडि बढाएको छ।’ यस बजेटको सबैभन्दा ठूलो आकर्षण ‘गोल्डेन डोम’ मिसाइल डिफेन्स सिस्टम हो।

सामाजिक सुरक्षा र घरेलु कार्यक्रमहरूमा कटौती गर्दै ट्रम्पले घरेलु कार्यक्रमहरूमा ७३ अर्ब डलर कटौतीको प्रस्ताव गरेका छन्। यस कटौतीले जलवायु परिवर्तन, नवीकरणीय ऊर्जा परियोजना, आवास, शिक्षा र स्वास्थ्य सेवामा समानता कायम गर्ने कार्यक्रमहरूलाई असर गर्नेछ। बजेटमा शरणार्थी पुनर्स्थापना र वैदेशिक सहायता कार्यक्रमहरूमा पनि व्यापक कटौती गरिएको छ। ट्रम्पले स्वास्थ्य सेवा कार्यक्रम ‘मेडिकेड’ र ‘मेडिकेयर’ लाई संघीय सरकारबाट हटाएर राज्य सरकारहरूको जिम्मामा सार्न खोज्नु विवादास्पद छ।