अमेरिकी राष्ट्रपति डोनाल्ड ट्रम्पले इरानको प्रशोधित युरेनियम कब्जा गर्ने सैन्य अपरेसनलाई आफ्नो मुख्य रणनीतिक लक्ष्य बनाएको बताइएको छ। इरानसँग करिब ४४० किलोग्राम ६० प्रतिशतसम्म संवर्धित युरेनियम रहेको छ, जुन ९० प्रतिशतसम्म पुर्याएर आणविक हतियार बनाउन सकिन्छ। इरानको कुनै गोप्य भूमिगत परमाणु केन्द्रमा धावा बोलेर अमेरिकी सेनाले प्रशोधित युरेनियम कब्जा गर्ने कुरा सुन्दा झट्ट असम्भव जस्तो लाग्न सक्छ। तर पछिल्लो समय सार्वजनिक भएका समाचार अनुसार अमेरिकी राष्ट्रपति डोनाल्ड ट्रम्पले यसलाई आफ्नो मुख्य रणनीतिक लक्ष्य बनाएको दाबी गरिएको छ।
इरानलाई परमाणु हतियार विकास गर्नबाट रोक्नका लागि ट्रम्पले यसको आणविक भण्डार कब्जा गर्ने विकल्पमा विचार गरिरहेको बताइन्छ। तर यस्तो सैन्य कारबाही अमेरिकाको लागि केवल कठिन मात्र नभई निकै जोखिमपूर्ण हुने सैन्य विशेषज्ञ तथा पूर्व अमेरिकी रक्षा अधिकारीहरूको भनाइ छ। यसका लागि अमेरिकी सेनाले ठूलो संख्यामा स्थल सेना परिचालन गर्नुपर्नेछ र मिशन पूरा गर्न केही दिन मात्र होइन हप्तौँसम्म लाग्न सक्छ। रणनीतिक उद्देश्य र विकल्पहरूको खोजीमा ट्रम्प प्रशासनले इरानमाथि दबाब सिर्जना गर्न विभिन्न सैन्य विकल्पहरू खुला राखेको देखिन्छ।
वरिष्ठ अमेरिकी अधिकारीहरूका अनुसार युद्धको सुरुवातमा इरानसँग करिब ४४० किलोग्राम तौलको ६० प्रतिशतसम्म संवर्धित युरेनियम थियो। यो युरेनियमलाई तत्कालै ९० प्रतिशतमा पुर्याएर आणविक हतियारको स्तरमा रूपान्तरण गर्न सकिन्छ। यसका अतिरिक्त इरानसँग २० प्रतिशत प्रशोधित युरेनियम करिब १ हजार किलोग्राम र ३.६ प्रतिशत प्रशोधित युरेनियम ८ हजार ५०० किलोग्राम रहेको अनुमान छ। यद्यपि ह्वाइट हाउसले यसबारेमा कुनै निर्णय नभएको जनाएको छ।
विश्लेषकहरूका अनुसार अमेरिकाले आफ्नो ८२औँ वायुसेना डिभिजन प्रयोग गरेर इस्फहान र नतान्ज वरिपरिका क्षेत्र सुरक्षित गर्न सक्छ। त्यसपछि विशेष प्रशिक्षित सैन्य बलहरूले भूमिगत सुरुङहरूमा प्रवेश गरेर युरेनियम निकाल्ने प्रयास गर्नेछन्। युरेनियम सामान्यतया ग्यासको रूपमा ठूलो धातु कन्टेनरमा भण्डारण गरिएको हुन्छ। तर सुरुङहरूमा पुग्नका लागि त्यसमा थुपारिएको फोहोर हटाउन भारी उपकरण आवश्यक पर्न सक्छ। यस क्रममा अमेरिकी सेनाले निरन्तर ठूलो जोखिम मोल्नुपर्ने हुन्छ।
सम्बन्धित खबर
