स्वयम्भू महोत्सवमा खेलकर्मीहरूलाई सम्मान

१७ वैशाख, काठमाडौं । काठमाडौं महानगरपालिका वडा १५ ले स्वयम्भू महोत्सवको अवसरमा आफ्नो वडाका खेलकर्मीहरूलाई सम्मान गरेको छ । वडाले भूकम्प स्मृति बहुउद्देश्यीय हलमा खेलाडी सम्मान तथा खेलकुद प्रदर्शनीको आयोजना गरेको थियो । नेपाल ओलम्पिक कमिटीका अध्यक्ष जीवनराम श्रेष्ठ र वडा १५ का अध्यक्ष ईश्वरमान डङ्गोलले नौ पटककी राष्ट्रिय महिला टेबलटेनीस च्याम्पियन नविता श्रेष्ठ, ओलम्पियन स्की खेलाडी सफलराम श्रेष्ठ सहित विभिन्न खेलका दर्जनौं खेलाडी, पूर्वखेलाडी तथा प्रशिक्षकहरूलाई सम्मान गरे।

सो अवसरमा उसु र कुङफुका डेमोन्स्ट्रेसन पनि भएको थियो। त्यस्तै टेबलटेनीस र ब्याड्मिन्टनका ओलम्पिक छात्रवृत्तिमा रहेका खेलाडीहरुले आफ्नो खेलसम्बन्धी प्रस्तुति दिएका साथै प्रदर्शनी खेलमा पनि सहभागी भएका थिए। स्वयम्भू महोत्सवमा विभिन्न सांस्कृतिक, मनोरञ्जनात्मक कार्यक्रमसँगै खेलकुद कार्यक्रम पनि समावेश गरिएको छ। वैशाख १२ गतेबाट सुरु भएको स्वयम्भू महोत्सव वैशाख १९ गतेसम्म सञ्चालन हुनेछ।