२० वैशाख, काठमाडौं। अर्थमन्त्री डा. स्वर्णिम वाग्लेमध्येले नेपालको वर्तमान आर्थिक अवस्थालाई १० वर्षअघिको भारतको अवस्थामा समान रहेको बताएका छन् र अब नेपालले आर्थिक उछाल लिनुपर्ने समय आएको बताउनुभएको छ। बाह्रखरी मिडियाद्वारा आयोजित कार्यक्रममा बोल्दै मन्त्री वाग्लेले सन् २०१४ मा भारतको प्रतिव्यक्ति आम्दानी १ हजार ५ सय डलर थियो र अहिले नेपाल पनि त्यहि स्तरमा पुगेको हुँदा यसलाई नेपालको ‘आर्थिक प्रस्थान बिन्दु’ भएको ठानेको बताए।
राष्ट्रिय स्वतन्त्र पार्टी (रास्वपा) नेतृत्वको वर्तमान सरकारले पाँच वर्षको पूर्ण कार्यकाल पूरा गर्ने दाबी गर्दै उनले यसले लगानीकर्ताका लागि नीतिगत स्थिरता र सुनिश्चितता प्रदान गर्ने बताएका छन्। ‘विगतमा नीतिगत कब्जा र भ्रष्ट राजनीतिज्ञसँगको अस्वस्थ सम्बन्धले व्यापारिक वातावरण धमिलिएको थियो। अब त्यो अन्त्य हुनेछ,’ उनले भने, ‘कानुन कार्यान्वयनमा हामी निर्मम र कठोर हुनेछौं तर इमानदार उद्यमीहरूलाई डराउनु पर्दैन।’
आगामी बजेट निजी क्षेत्रमैत्री हुने जानकारी दिँदै उनले लगानी सुरक्षा, सम्पत्तिको रक्षा र करार कार्यान्वयनलाई उच्च प्राथमिकता दिइने बताए। निजी क्षेत्रमा मनोबल उच्च बनाउन सरकारले प्रतिबद्धता जनाएको मन्त्री वाग्लेले इमानदार व्यवसायीहरूलाई सरकारले पूर्ण संरक्षण दिने कुरामा जोड दिए। ‘हामी चाहन्छौं कि निजी क्षेत्र इमानदारिताको आधारमा उभिएर व्यवसाय विस्तार गरोस् र राष्ट्रको अर्थतन्त्रमा योगदान पुर्याओस्,’ उनले भने।
आगामी ७ वर्षमा प्रतिव्यक्ति आम्दानी ३००० डलर र अर्थतन्त्रको आकार १०० अर्ब डलरको हाराहारीमा पुर्याउने लक्ष्य राखिएको जानकारी पनि उनले दिए। भारतले विगत १०–१२ वर्षमा हासिल गरेको ९ देखि १० प्रतिशत आर्थिक वृद्धिलाई नेपालले पनि पछ्याउन सक्ने उनको भनाइ छ। मन्त्री वाग्लेले नेपालको पर्यटन, जलविद्युत् र उच्च मूल्यका कृषि उपजले विश्व बजारमा प्रतिस्पर्धा गर्न सक्ने बताए।
नेपाल भूपरिवेष्ठित राष्ट्र भएकाले भौगोलिक जटिलता पार गर्न ‘डिजिटलाइजेसन’ नै प्रमुख अस्त्र हुने उनको तर्क छ। सूचना प्रविधिलाई प्राथमिकता दिनकै लागि सूचना प्रविधि विभागलाई प्रधानमन्त्री कार्यालयको अधीनमा ल्याइएको र यसले सेवा प्रवाहमा क्रान्ति ल्याउने विश्वास उनले व्यक्त गरे। ‘हामी सन् २०२७ सम्मको चुनावी चक्र पर्खिरहेका थियौँ, तर ‘जेनजी’ आन्दोलनले हामीलाई समयअगावै जिम्मेवारी सुम्पेको छ। अब हामी सुशासन र आर्थिक वृद्धिको स्पष्ट मार्गचित्रसहित अगाडि बढ्नेछौं,’ उनले भने।
अर्थमन्त्री डा. स्वर्णिम वाग्लेले रुग्ण कानुनहरूको खारेजी र प्रशासनिक झन्झट अन्त्य गर्नु आफ्नो पहिलो प्राथमिकता रहेको पनि पुनः दोहोर्याए।
