सरकारले बागमती नदी र यसका सहायक नदी किनारका अव्यवस्थित तथा सुकुमवासी बस्ती हटाउने कार्य निरन्तरता दिइरहेको छ। प्रधानमन्त्रीको सचिवालयले १८ सय १६ परिवार र ७ हजार ७८९ सदस्यलाई सुकुमवासी भएको दाबी गर्दै सरकारसँग सम्पर्कमा आएको जनाएको छ।
सरकारले ७९४ जनालाई चार होल्डिङ सेन्टरमा स्थानान्तरण गरेको र बाँकीले आफ्नै पहलमा आवासको व्यवस्था गर्ने जनाएको छ। काठमाडौंमा २० वैशाखमा प्रधानमन्त्री सचिवालयले सार्वजनिक गरेको तथ्यांकअनुसार, सम्पर्कमा आएका ती १८ सय १६ परिवारमा ७ हजार ७८९ जना सदस्य रहेका छन्।
सरकारले अव्यवस्थित बसोबास गरिरहेका व्यक्तिहरूलाई विभिन्न चार वटा होल्डिङ सेन्टरमा राखेको जानकारी पनि प्रस्तुत गरेको छ। स्थानान्तरण गरिएका ७९४ जनालाई व्यवस्थित होल्डिङ सेन्टरहरूमा राखिएको छ भने दशरथ रंगशालास्थित स्क्रिनिङ सेन्टरमा आएका बाँकीले हाल आफ्नै पहलमा आवासको व्यवस्था गरी बाहिरिएको थाहा गरिएको छ।
हाल सञ्चालनमा भएका होल्डिङ सेन्टरहरूमा कीर्तिपुरस्थित राधास्वामी सत्संघ भवन, नयाँ बसपार्क र माछापोखरी क्षेत्रका होटलहरू, भक्तपुरस्थित नेपाल विद्युत प्राधिकरणको तालिम केन्द्र, र बोडेस्थित कृषि तालिम केन्द्र समावेश छन्।
