क्याम्बोडियाले ‘अनलाइन स्क्याम’ लगायत अवैध गतिविधिमा संलग्न व्यक्तिहरूविरुद्ध कडा कानुन लागु गरेसँगै त्यहाँ रहेका र जान चाहने नेपाली नागरिकहरूलाई सचेत गराइएको छ। थाईल्याण्डको ब्याङ्ककस्थित नेपाली दूतावासका नियोग उपप्रमुख मोतीबहादुर श्रीसले जानकारी दिए अनुसार, क्याम्बोडियाले गत सातादेखि नयाँ कानुन लागू गरेको छ, जसअनुसार अपराधको प्रकृतिअनुसार पाँच लाख अमेरिकी डलरसम्म जरिवाना र दुई वर्षदेखि आजीवन कैदसम्मको सजाय निर्धारण गरिएको छ।
नेपालीहरूको पनि त्यस्ता अवैध गतिविधिमा संलग्न भइ भिसा अवधि सकिएपछि बस्ने अवस्था भेटिएको छ। दूतावास र नेपाल प्रहरीले काठमाण्डूस्थित मानव बेचबिखन अनुसन्धान ब्यूरोको सहकार्यमा नेपाली नागरिकहरूलाई सचेत गराइएको छ। विगत तीन वर्ष (सन् २०२३, २०२४ र २०२५) मा क्याम्बोडियामा पर्यटक भिसामा २१ हजार नेपाली पुगेका छन्। नियोग उपप्रमुख श्रीसले भने, “यी सबै नेपाली नागरिकहरू अहिलेसम्म क्याम्बोडियामा नभए पनि धेरै त्यहाँ रहेको अनुमान छ।”
सन् २०२६ को जनवरीदेखि अहिलेसम्म ५७६ जना नेपालीहरूलाई नेपाल फर्काइएको छ। उनले थपे, “हामीले सात लटमा नेपालीहरूलाई फर्काएका छौँ, जुन मध्ये गत मार्च १० देखि मात्र २७७ जनालाई स्वदेश पठाइएको छ।” भिसा अवधि सकिएका नेपालीहरूले क्याम्बोडिया सरकारले दैनिक १० अमेरिकी डलर जरिवाना तिर्न बाध्य पार्ने गरिएको छ। नयाँ कानुन लागु भएपछि यो प्रक्रिया अझ कठोर बन्न सक्ने देखिन्छ।
अधिकारीहरूले श्रम स्वीकृतिबिना पर्यटक भिसामा लामो समय बिताइरहेका नेपालीहरूबारे क्याम्बोडियामा सूचित गर्न आग्रह गरेका छन्। हाल ७२ जना नेपाली क्याम्बोडियाली डिटेन्शन सेन्टरमा थुनिएका छन्। “हामीले ५९ जनालाई फर्काउने तयारी गरिरहेका छौँ र केही दिनभित्र उनीहरूलाई नेपाल फर्काइनेछ,” श्रीसले बताए। वैदेशिक रोजगारको नाममा ठगी हुनसक्ने भएकाले रोजगारदाताबारे राम्ररी जानकारी राखेर मात्र जाने अनुरोध गरिएको छ।
