गोकुल बास्कोटाद्वारा संविधान संशोधनका सुझाव: प्रदेश र जसस खारेज, उपराष्ट्रपतिलाई राष्ट्रिय सभाको अध्यक्ष बनाउने प्रस्ताव

२४ वैशाख, काठमाडौं । नेकपा एमालेका गोकुलप्रसाद बास्कोटाले संविधान संशोधनको विषयमा प्रदेश संरचना र जिल्ला समन्वय समिति (जसस) खारेज गर्न सुझाव दिएका छन्। उनले राष्ट्रिय सभा पूर्ण रूपले समावेशी बनाउन र प्रतिनिधि सभा बाट समानुपातिक सिट हटाउन समेत सुझाव दिएका छन्। साथै, उपराष्ट्रपतिलाई राष्ट्रिय सभाको अध्यक्ष बनाउने विषयमा पनि सकारात्मक विचार व्यक्त गरेका छन्।

पूर्वमन्त्री बास्कोटाले आज सामाजिक सञ्जाल फेसबुकमार्फत यी सुझावहरू सार्वजनिक गरेका छन्। उनले सरकारको नेतृत्वकर्ता दल रास्वपाले संघीयता खारेज गर्नुपर्ने कुरा उठाएको स्मरण गर्दै प्रश्न गरेका छन्, “अब संविधान संशोधन गर्ने कि नगर्ने?” उनले भनेका छन्, “गर्ने हो भने मात्र केन्द्र र पालिकामा गरियोस्।”

उनले राष्ट्रिय सभामा १०५ सिट बनाउने र महिला तथा पुरुषको ५०–५० प्रतिशत प्रतिनिधित्व सुनिश्चित गर्ने सुझाव दिएका छन्। बास्कोटाले थप लेखेका छन्, “राष्ट्रिय सभा १०५ सिट, पुरै समावेशी, महिला पुरुष ५०–५० प्रतिशत, उपराष्ट्रपति नै सभाध्यक्ष हुने व्यवस्था होस्।” उनले प्रतिनिधि सभा बाट समानुपातिक सिट खारेज गर्दै महिला र पुरुषको ४०–६० प्रतिशत प्रत्यक्ष प्रतिनिधित्वको पक्षमा धारणा व्यक्त गरेका छन्।