२४ वैशाख, काठमाडौँ । वन तथा वातावरण मन्त्रालयका प्रवक्ता तथा जलवायु परिवर्तन व्यवस्थापन महाशाखा प्रमुख डा. महेश्वर ढकालले नेपालको सामाजिक–आर्थिक समृद्धिका लागि जलवायु उत्थानशील समाज निर्माण अपरिहार्य रहेको बताएका छन् । जलवायु परिवर्तनसम्बन्धी नीतिगत समीक्षाका क्रममा उनले आर्थिक समृद्धि र जलवायु उत्थानशीलता एकअर्काका परिपूरक रहेको स्पष्ट पारे । ‘नेपालका ६० देखि ६६ प्रतिशत जनता अझै पनि कृषि क्षेत्रमा निर्भर छन्, जसले जलवायु परिवर्तनको प्रभावलाई प्रत्यक्ष रूपमा अनुभव गर्छन्,’ उनले बताए।
डा. ढकालले जलवायु परिवर्तनको प्रभावलाई ध्यानमा राख्दै नीति निर्माणमा आर्थिक समृद्धिलाई प्राथमिकता दिनुपर्नेमा जोड दिए। उनले भने, ‘जलवायु नीति र आर्थिक विकासको समन्वयले मात्र दीगो विकास सुनिश्चित गर्न सक्छ।’ यसका लागि सबै पक्षको सहकार्य आवश्यक रहेको उनले बताए।
