२४ वैशाख, सप्तरी । सिरहा लहान नगरपालिका–१० का ४७ वर्षीय मोहम्मद सदाम र ६० वर्षीय मोहम्मद ताहिर मियाँलाई अपहरण गरी गोली प्रहार गरेर घाइते बनाएको आरोपमा प्रहरीले पाँच जनालाई पक्राउ गरेको छ। माघ महिनामा यी दुबै व्यक्ति अपहरण गरिएका थिए र माघ ४ गते गोली प्रहार गरिएको घटना सार्वजनिक भएको थियो। खडक नगरपालिका–५ खरचुहियाकी ४२ वर्षीया मिना खातुनले जमिन खरिद गर्न गएका सदाम र ताहिरलाई अपहरण गरी उनीहरूसँग रहेको रुपैयाँ लुटी गोली प्रहार गरेर घाइते बनाइएको पुष्टि प्रहरीले गरेको छ।
सप्तरी जिल्ला प्रहरी कार्यालयका अनुसार पक्राउ पर्नेहरूमा जग्गाधनी मिना खातुन, रूपनी गाउँपालिका–५ का ४३ वर्षीय हजरत मियाँ, राजगढ गाउँपालिका–६ का ४५ वर्षीय मञ्जित मियाँ, खडक नगरपालिका–६ वीरपुरका ४८ वर्षीय मुमताज मियाँ र सुरङगा नगरपालिका–३ का ३५ वर्षीय उपेन्द्र मोची रहेका छन्। पक्राउ परेकामाथि अपहरण, शरीर बन्दी राख्ने र ज्यान मार्ने आरोपमा सप्तरी जिल्ला अदालतले पाँच दिनको म्यादमा अनुसन्धान अनुमति दिएको छ। यसैबीच, मुमताज मियाँमाथि १३ वटा ठगीसम्बन्धी मुद्दा दर्ता भएकाले र उपेन्द्र मोचीमाथि ज्यानसम्बन्धी कसुरको मुद्दा दर्ता रहेको प्रहरीले जानकारी दिएको छ।
