पश्चिम बंगाल : ममता बनर्जीको गढ भत्काउँदै मुख्यमन्त्री बनेका शुभेन्दु अधिकारी को हुन्

भारतको पश्चिम बंगाल राज्यमा लामो समय सत्ता चलाएकी पूर्व मुख्यमन्त्री ममता बनर्जीको शिष्य मानिएका शुभेन्दु अधिकारीले उनलाई पदबाट विस्थापित गरेका छन्। केही वर्ष अघि आपसी सम्बन्ध बिग्रिनुअघि शुभेन्दु अधिकारी ममता बनर्जीका निकट सहयोगी थिए। केही दिनअघि भारतीय जनता पार्टी (भाजपा) बाट चुनाव जितेका अधिकारीले शनिबार पश्चिम बंगालका मुख्यमन्त्री पद तथा गोपनीयताको शपथ ग्रहण गरेका छन्। यससँगै, पश्चिम बंगाल राज्यमा प्रधानमन्त्री नरेन्द्र मोदी नेतृत्वको हिन्दू राष्ट्रवादी भाजपा पार्टीले पहिलो पटक सत्तारोहण गरेको हो।

शुक्रबार मात्र भाजपाले शुभेन्दु अधिकारीलाई संसदीय दलको नेता चयन गरेको थियो। पश्चिम बंगालले गम्भीर आर्थिक चुनौतीहरू सामना गरिरहेका बेला उनले मुख्यमन्त्री पद सम्हालेका छन्। कुल २९४ सिटमध्ये २०७ मा जित हासिल गर्दै भाजपाले ममता बनर्जीको १५ वर्षे सत्तायात्रामा पूर्णविराम लगाएको छ। शुभेन्दु अधिकारीको राजनीतिक यात्रा भाजपाबाट भने सुरु भएको होइन। सन् १९९० मा पश्चिम मेदिनीपुर जिल्लामा बंगालको प्रभावशाली राजनीतिक परिवारमा उनको जन्म भएको हो।

वामपन्थी विरोधी शक्ति रूपमा देखिएका बेला तृणमूल कांग्रेसमा सामेल हुनुअघि उनी कांग्रेस पार्टीबाट उदाएका थिए। तटीय पश्चिम बंगाल क्षेत्रमा राजनीतिक नेटवर्क फैलाएका शुभेन्दुका पिता सिसिर अधिकारी एक अनुभवी राजनीतिज्ञ थिए, जसको परिवारका धेरै सदस्य जननिर्वाचित पदमा रहेका छन्। साधारण रुपमा आफूलाई प्रस्तुत गर्दै आएका शुभेन्दु अधिकारी साङ्गठनिक कौशलका कारण छोटो समयमा तृणमूल कांग्रेस भित्र शक्तिको वैकल्पिक केन्द्र बन्दै गए।

राजनीतिक विश्लेषकहरूका अनुसार तृणमूल कांग्रेसलाई सत्तामा ल्याउन महत्त्वपूर्ण भूमिका खेलेका नन्दीग्राम आन्दोलनका मुख्य शिल्पकार शुभेन्दु नै थिए। सन् २००६ मा कान्थी दक्षिणबाट जितेपछि, उनले सन् २००७ मा तत्कालीन वाम मोर्चा सरकारविरुद्ध भूमि निष्काशन प्रतिरोध समितिको ब्यानरमा स्थानीय बासिन्दाहरूलाई एकत्रित पार्न अहम भूमिका खेलेका थिए। हाल, शुभेन्दु अधिकारीले भाजपामा सामेल भएर तृणमूल कांग्रेसको गढ मानिने क्षेत्रहरूमा महत्वपूर्ण नतिजा हासिल गर्न मद्दत गरेका छन्।