२७ वैशाख, काठमाडौं। संघीय संसद्को बजेट अधिवेशन भोलि सोमबारदेखि प्रारम्भ हुँदैछ। सोही दिन सरकारको नीति तथा कार्यक्रम पनि प्रस्तुत गरिनेछ। राष्ट्रपतिहरु रामचन्द्र पौडेलले संघीय संसद्का दुवै सदनको संयुक्त बैठकलाई भोलि सम्बोधन गर्ने कार्यक्रम रहेको संसद् सचिवालयका प्रवक्ता एकराम गिरीले जानकारी दिएका छन्। नेपालको संविधानको धारा ९५ अनुसार राष्ट्रपतिले अपराह्न ४:०० बजे सरकारको नीति तथा कार्यक्रम प्रस्तुत गर्ने प्रबन्ध छ।
उक्त धाराले प्रतिनिधिसभाको निर्वाचन पश्चातको पहिलो अधिवेशन र प्रत्येक वर्षको पहिलो अधिवेशन सुरु भएपछि राष्ट्रपतिले दुवै सदनको संयुक्त बैठकलाई सम्बोधन गर्ने व्यवस्था गरेको छ। राष्ट्रपतिज्यूबाट नीति तथा कार्यक्रम प्रस्तुत गरिने संयुक्त बैठकमा अपराह्न ३:४५ बजे अगावै उपस्थित हुन प्रतिनिधिसभा तथा राष्ट्रियसभाका सदस्यहरुलाई संसद् सचिवालयले अनुरोध गरेको छ। त्यसअघि अपराह्न २:०० बजे प्रतिनिधिसभा र राष्ट्रियसभाका बैठकहरू हुनेछ।
संसद् सचिवालयका अनुसार प्रतिनिधिसभाको बैठकमा राष्ट्रपतिबाट अधिवेशन आह्वानसम्बन्धी पत्रबारे जानकारी गराइने, मन्त्रिपरिषद्को हेरफेर सम्बन्धी राष्ट्रपतिको कार्यालयबाट प्राप्त सूचनाबारे सदनलाई जानकारी गराइने सम्भावित कार्यसूची रहेको छ। त्यस्तै, सभामुखको अनुपस्थितिमा बैठकको अध्यक्षता गर्ने सदस्यहरूको मनोनयन, प्रतिनिधिसभा नियमावली, २०७९ को नियम २६० बमोजिम जारी भएको बाधा अड्काउ फुकाउ अनुमोदनका लागि प्रस्तुत गरिने, प्रतिनिधिसभा नियमावलीको मस्यौदा प्रस्तुत हुने लगायतका कार्यसूचीहरू रहेका छन्। साथै, सरकारले जारी गरेका ‘सार्वजनिक खरिद (दोस्रो संशोधन) अध्यादेश, २०८३’, ‘सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३’, ‘संवैधानिक परिषद् (काम, कर्तव्य, अधिकार र कार्यविधि) पहिलो संशोधन अध्यादेश, २०८३’ लगायत आठ अध्यादेशहरू प्रस्तुत गर्ने कार्यसूची रहेको संसद सचिवालयले जनाएको छ। ती अध्यादेशहरू राष्ट्रियसभाको बैठकमा पनि प्रस्तुत हुनेछन्।
