नेपालमा जेठ ८ देखि १५ गतेसम्म आयोजना हुन लागेको काभा महिला भलिबल च्याम्पियनसिप एफआईभीबीको विश्व वरीयता प्राप्त प्रतियोगिता हुनेछ। नेपाल भलिबल संघका अध्यक्ष जितेन्द्र बहादुर चन्दले यस प्रतियोगिता जितेका नेपाली महिला टिम एसिया कपमा छनोट हुने बताएका छन्। नेपाली महिला भलिबल टिमका मुख्य प्रशिक्षक जगदिश भट्टले यस च्याम्पियनसिपपछि नेपाल विश्व वरीयतामा समावेश हुने जानकारी दिएका छन्।
नेपालमा जेठ ८ देखि १५ गतेसम्म आयोजना हुने काभा महिला भलिबल च्याम्पियनसिप एफआईभीबीको विश्व वरीयता प्राप्त प्रतियोगिता हुने नेपाल भलिबल संघले जनाएको छ। आइतबार काठमाडौंमा आयोजित च्याम्पियनसिप ट्रफी सार्वजनिक कार्यक्रममा नेपाल भलिबल संघका अध्यक्ष जितेन्द्र बहादुर चन्दले यो च्याम्पियनसिप एफआईभीबी वर्ल्ड र्याङ्किङमा समावेश हुने जानकारी दिए। नेपालमा यसअघि काभाका विभिन्न प्रतियोगिता आयोजना भए पनि त्यसले वर्ल्ड र्याङ्किङको लागि मान्यता पाएको थिएन। तर यसपटक एफआईभीबीको वर्ल्ड र्याङ्किङमा समेत समावेश हुने भएकाले काभा महिला भलिबल च्याम्पियनसिप नेपालको लागि धेरै महत्त्वपूर्ण हुने अध्यक्ष चन्दले बताए।
उनले भने, “यस प्रतियोगिता जितेमा एसिया कपमा छनोट हुने र त्यसबाट अझ ठूलो प्रगति गर्न सकिन्छ। यो प्रतियोगितामा जितेमा नेपाली महिला टिमको भाग्य चम्किनेछ। यदि हाम्रो टिमले घरेलु कोर्टमा ट्रफी जित्न सकेमा अर्को वर्ष २०२७ मा एसिया कप खेल्ने अवसर प्राप्त हुनेछ। र, त्यसमा पनि शीर्ष ६ मा परेमा अझ माथि जाने बाटो खुल्नेछ।”
“यो प्रतियोगिता एफआईभीबी वर्ल्ड र्याङ्किङ टुर्नामेन्ट भएकोले टिमले राम्रो नतिजा ल्याउन सकेमा धेरै फाइदा हुनेछ,” अध्यक्ष चन्दले थपे। नेपालले गत वर्ष कात्तिकमा टुँडिखेलमा आयोजना गर्ने योजना गरेको आउटडोर काभा महिला नेसन्स लिग प्रतियोगिता एफआईभीबीको वर्ल्ड र्याङ्किङ टुर्नामेन्ट भए पनि २०८२ भदौमा नेपालमा भएको जनजी आन्दोलनका कारण आयोजक अधिकार गुमाएको थियो। जसको असर नेपालको अन्तर्राष्ट्रिय सहभागितामा परेको थियो।
त्यसपछि त्यो टुर्नामेन्ट उज्बेकिस्तानमा आयोजना हुँदा चार मात्र टिम सहभागी भए, नेपाल सहभागी भएन। त्यो टुर्नामेन्ट खेल्ने टिमहरू अहिले एसियाली स्तरमा प्रतिस्पर्धा गरिरहेका छन् भने नेपाल अझै काभा प्रतियोगितामा सीमित छ। यसले गर्दा नेपाल अहिले एफआईभीबीको वरीयतामा समावेश छैन। त्यस्तै नेपाली महिला भलिबल टिमका मुख्य प्रशिक्षक जगदिश भट्टले नेपालको अहिले विश्व वरीयतामा नरहेको तर यस काभा महिला भलिबल च्याम्पियनसिपपछि वरीयतामा समावेश हुने जानकारी दिएका छन्।
“हामी अहिले विश्व वरीयतामा छैनौं। महिलाको वरीयतामा छैनौं। पहिले हामी एफआईभीबीको वरीयतामा ८६औं स्थानमा थियौं। १९औं एसियन गेम्समा ११औं स्थान लिएका थियौं। विगतमा धेरै अन्तर्राष्ट्रिय प्रतियोगिता नहुँदा हामी वरीयतामा समावेश थिएनौं।” प्रशिक्षक भट्टले भने। जनजी आन्दोलनका कारण नेपालमा हुने प्रतियोगिता प्रभावित भएको र यस पटक फेरि नेपाल भलिबल संघले वरीयताप्राप्त प्रतियोगिता गर्ने भएकाले नेपाललाई लाभ हुने भट्टले बताए।
“यो जनजी आन्दोलनले रोकिएको थियो। नेपालमा हुने प्रतियोगिता आन्दोलनपछि उज्बेकिस्तानमा भयो। यस पटक भलिबल संघ अध्यक्षको पहलमा विश्व वरीयताको प्रयासस्वरूप यो प्रतियोगिता नेपालमा हुँदैछ,” उनले भने, “हामी यो प्रतियोगितामा समावेश हुनु नै विश्व वरीयतामा समावेश हुनु हो। राम्रो प्रदर्शन गरेमा विश्वमा ५० देखि ६० औं स्थानसम्म पुग्ने सम्भावना छ।” भलिबल संघका अध्यक्ष चन्दले विश्व वरीयतामा पर्नका लागि काभा देखि एभीसीका प्रतियोगिताहरू नियमित खेल्नुपर्ने र त्यसका लागि ठूलो बजेट चाहिने बताए।
“विश्व वरीयतामा पर्नका लागि विश्व वरीयता प्राप्त गेमहरू खेल्नुपर्छ। अहिले काभाको पुरुषको प्रतियोगिता पाकिस्तानमा हुनेछ भने महिलाको हामी आफैं आयोजना गर्दैछौं,” उनले भने, “एभीसीका प्रतियोगिताहरू खेल्नुपर्छ। काभाको वरीयता प्राप्त प्रतियोगिता खेल्नुपर्छ। यो प्रतियोगितामा ट्रफी जितेमा मलाई लाग्छ नेपाल टप २० भित्र पर्छ।” चन्दले अन्य राष्ट्रका सरकारले खेललाई सहयोग गर्ने भएकाले सहज भएको पनि बताए।
