नेपाल उद्योग वाणिज्य महासंघले सरकारले घोषणा गरेको मूल्य पारदर्शिता सप्ताहलाई पूर्ण समर्थन गर्दै देशभरका उद्योगी–व्यवसायीहरूलाई सहभागी हुन आग्रह गरेको छ। उद्योग, वाणिज्य तथा आपूर्ति मन्त्रालयले वैशाख २८ देखि जेठ ३ गतेसम्म मूल्य पारदर्शिता सप्ताह मनाउने निर्णय गरेको छ। महासंघले सदस्य संघहरूलाई मूल्यसूची अनिवार्य रूपमा राख्न र जिल्ला संघहरूलाई सचेतनामूलक कार्यक्रममा सहभागी हुन अनुरोध गरेको छ। २७ वैशाख, काठमाडौं।
नेपाल उद्योग वाणिज्य महासंघले सरकारले घोषणा गरेको मूल्य पारदर्शिता सप्ताहलाई पूर्ण समर्थन जनाउँदै देशभरका उद्योगी–व्यवसायीहरूलाई यस अभियानमा सहभागी हुन आग्रह गरेको छ। उद्योग, वाणिज्य तथा आपूर्ति मन्त्रालयले वैशाख २८ गतेदेखि जेठ ३ गतेसम्म देशव्यापी रूपमा ‘मूल्य पारदर्शिता सप्ताह’ मनाउने निर्णय गरेसँगै महासंघले एकता जनाएको हो।
आइतबार एक प्रेस विज्ञप्ति जारी गर्दै महासंघले बजारमा वस्तु तथा सेवाहरूको मूल्यमा एकरूपता ल्याउन र स्वच्छ व्यावसायिक वातावरण निर्माण गर्न यो अभियान प्रभावकारी हुने विश्वास व्यक्त गरेको छ। महासंघले मन्त्रालयको निर्देशन अनुसार आफ्ना सदस्य उद्योग वाणिज्य संघहरू, वस्तुगत संघहरू र आबद्ध व्यवसायीहरूलाई सम्पूर्ण उद्योगी, पैठारीकर्ता, आपूर्तिकर्ता, थोक तथा खुद्रा विक्रेताहरूलाई आफूले बिक्री गर्ने वस्तु तथा सेवाहरूको अद्यावधिक मूल्यसूची अनिवार्य र स्पष्ट देखिने गरी राख्न आग्रह गरेको छ।
महासंघले जिल्ला तथा नगर उद्योग वाणिज्य संघहरूलाई आ–आफ्नो क्षेत्रका बजारमा मूल्यसूची राखिएको वा नभएको सुनिश्चित गर्न र सचेतनामूलक कार्यक्रममा सहभागी हुँदै यस अभियानलाई सफल बनाउन देशभरका सम्पूर्ण उद्योगी–व्यवसायीलाई सक्रिय रूपमा सहभागी हुन समेत अनुरोध गरेको छ।
