अर्थमन्त्री डा. स्वर्णिम वाग्लेले बजेटमा अस्वाभाविक अंक राख्ने प्रवृत्ति रहेको भन्दै त्यसलाई सुधार गर्ने बताएका छन्। सरकारले साढे १९ खर्ब रुपैयाँ विनियोजन गरेको भए पनि खर्च १६ खर्ब बराबर मात्र गर्न सक्ने अवस्था रहेको जनाएका छन्। चालु आर्थिक वर्षमा पूँजीगत खर्च अहिलेसम्मकै बढी हुने अनुमान गर्दै स्रोतको चुनौती रहेको स्वीकार गरेका छन्। २९ वैशाख, काठमाडौं।
प्रतिनिधिसभा अर्थ समितिको बैठकमा बोल्दै उनले वर्तमान सरकारले साढे १९ खर्ब रुपैयाँभन्दा बढी बजेट विनियोजन गरेको भएपनि खर्च १६ खर्ब रुपैयाँमा मात्र सिमित राख्न सकिने अवस्था रहेको जानकारी गराए। बजेट निर्माण प्रक्रियामा विगतदेखि नै अस्वाभाविक अंक राख्ने प्रवृत्तिले यही स्थिति सिर्जना गरेको उनले बताए।
विशेषगरी पूँजीगत पक्षमा २ खर्ब लगभग मात्र खर्च हुने हुँदा यो खर्चले सरकारले देखेका आर्थिक लक्ष्य पुरा नहुने उनले बताए। त्यसकारण अर्थतन्त्रको विकासमा निजी क्षेत्रको लगानी जरुरी रहेको उनको भनाइ छ। यस वर्ष १८ खर्ब ९० अर्ब रुपैयाँको लगभग सीमाभित्र बजेट विनियोजन गरिएको उल्लेख गर्दै उनले स्रोत जुटाउनेमा चुनौती रहेको स्वीकार गरे।
राजस्वबाट करिब १३ खर्ब रुपैयाँ मात्रै संकलन हुने सम्भावना रहेको र बाँकी ७ खर्बभन्दा बढीको स्रोत व्यवस्थापन नै मुख्य चुनौती रहेको बताए। चालु आर्थिक वर्षमा विनियोजित बजेट खर्चलाई वृद्धि गर्न इमर्जेन्सी मोडमा काम भइरहेको उनले पनि जानकारी दिए। असार मसान्तसम्ममा पूँजीगत खर्च अहिलेसम्मकै सबैभन्दा धेरै हुने उनको अनुमान छ।
