आईसीसी क्रिकेट विश्वकप लिग–२ अन्तर्गत स्कटल्याण्डले नेपाललाई २४४ रनको लक्ष्य प्रस्तुत गरेको छ। स्कटल्याण्डले ५० ओभरहरूमा ८ विकेट गुमाउँदै २४३ रन बनाएको थियो, जहाँ जर्ज मुन्सले सर्वाधिक ७५ रन बनाएका थिए। नेपालका सन्दीप लामिछानेले ४१ रन खर्चेर ४ विकेट लिए भने करण केसी र नन्दन यादवले दुई- दुई विकेट लिए। २९ वैशाख, काठमाडौं।
त्रिवि क्रिकेट मैदानमा टस जितेर पहिला ब्याटिङ गरेको स्कटल्याण्डले निर्धारित ५० ओभर पुरा गर्दै ८ विकेट गुमाएर २४३ रन बनायो। स्कटल्याण्डका लागि ओपनर जर्ज मुन्सले सर्वाधिक ७५ रन जोडे। उनले ६२ बलमा १२ चौका र २ छक्का प्रहार गरे। जर्जले फिल्ने म्याकरिथसँग पहिलो विकेटको लागि ११४ रनको साझेदारी गरे।
फिल्ने ६२ बलमा ३५ रनमा आउट भए। दुवै ओपनरलाई सन्दीप लामिछानेले एउटै ओभरमा आउट गराउँदै खेलको मोमेन्टम फेरि नेपालतर्फ ल्याए। त्यसपछि ब्रेनडन म्याकमुलेनले ९ बलमा ७ र कप्तान रिचि बेरिङटनले ११ बलमा ५ रन बनाएर आउट भए। १२८ रनमा ४ विकेट गुमाएको स्कटल्याण्डका लागि म्याथ्यु क्रस र माइकल इग्लिसले पाँचौं विकेटका लागि ४४ रनको साझेदारी गरे।
म्याथ्यु ३८ बलमा १८ रनमा आउट हुँदा इग्लिस ७२ बलमा ३४ रन बनाएर नटआउट रहे। मार्क वाटले १८ बलमा २४ र माइकल लिस्कले २३ बलमा २९ रन बनाई आउट भए। ज्याक जर्विस ० रनमा आउट भए। बलिङमा नेपालका सन्दीप लामिछाने निकै प्रभावशाली बने। आफ्नो स्पेल पूरा गरेको सन्दीपले ४१ रन खर्चेर ४ विकेट लिए। लय गुमाएको नेपालका लागि सन्दीपले मैदानमा फर्काउने भूमिका खेले। करण केसी र नन्दन यादवले दुई- दुई विकेट लिए।
