गोरखाको भीमसेनथापा गाउँपालिका–२ रातामाटेमा निर्माण सामग्री बोकेको ट्र्याक्टर दुर्घटनामा परेको छ। दुर्घटनामा गाउँपालिका–३ का १३ वर्षका विक्रम बस्यालको उपचारका क्रममा प्रदेश अस्पताल गोरखामा मृत्यु भएको छ। जिल्ला प्रहरी कार्यालयका सूचना अधिकारी राजकुमार श्रेष्ठका अनुसार, बस्यालको उपचारका क्रममा आज बिहान मृत्यु भएको हो।
दुर्घटनामा ट्र्याक्टर चालक सिरानचोक गाउँपालिका–८ का २६ वर्षीय राजन परियार गम्भीर घाइते भएका छन्। उनी अहिले सोही अस्पतालमा उपचाररत छन्। ३० वैशाखको रातमा भएको यो दुर्घटनाले स्थानीय समुदायमा शोकको माहोल सिर्जना गरेको छ।
