वान रन अन्तर्राष्ट्रिय हाफ म्याराथन नेपाल सहित ३७ देशका ११२ शहरहरूमा जेठ ९ गते एकै दिन आयोजना हुने भएको छ। एनएसआर स्पोर्ट फाउण्डेसनले विगत ३ वर्षदेखि नेपालमा वान रन हाफ म्याराथन आयोजना गर्दै आएको छ। प्रतियोगितामा करिब १२०० धावक सहभागी हुनेछन् र दौड पाटन मंगलबजारस्थित कृष्ण मन्दिरको अगाडिबाट सुरु हुनेछ।
नेपालमा खेलकुद र स्वस्थ जीवनशैली प्रवर्द्धन गर्ने उद्देश्यले आयोजना हुँदै आएको वान रन अन्तर्राष्ट्रिय हाफ म्याराथन यस वर्ष जेठ ९ गते आयोजना गरिनेछ। एनएसआर स्पोर्ट फाउण्डेसनको सहकार्यमा ‘एएनओ हिरो रेस’ को आयोजनामा वान रन अन्तर्राष्ट्रिय स्तरको हाफ म्याराथन नेपाल सहित विश्वभरिका ३७ देशका ११२ शहरहरूमा एकै दिन सञ्चालन गरिनेछ।
सन् २०२३ देखि निरन्तर रूपमा आयोजना हुँदै आएको यस अन्तर्राष्ट्रीय दौडले स्वस्थ जीवनशैली अपनाउन प्रेरणा दिएको साथै नेपाली र विदेशी धावकबीच खेलप्रतिको आकर्षण वृद्धि गर्न महत्वपूर्ण भूमिका निर्वाह गर्दै आएको फाउण्डेसनले जनाएको छ। फाउण्डेसनका अनुसार यस वर्षको प्रतियोगितामा करिब १२०० धावक र धाविकाहरूको सहभागिता रहनेछ।
प्रतियोगितामा हाफ म्याराथन (२१ कि.मी.), १० कि.मी., ५ कि.मी. र १ कि.मी. विधाहरूमा दौड संचालन गरिनेछ। दौड पाटन मंगलबजारस्थित कृष्ण मन्दिर अगाडिबाट सुरु भएर स्वहीं स्थानमा समाप्त हुनेछ। यस वर्ष १ कि.मी. वाकाथनमा नेपालका विभिन्न कूटनीतिक नियोगहरू तथा विविध मन्त्रालयका उच्च पदाधिकारीहरूको सहभागिता रहने आयोजकले जानकारी दिएका छन्। दौड जेठ ९ गते विहान ६:३० बजे सुरु भएर ८:३० बजे समाप्त हुने आयोजकले उल्लेख गरेका छन्।
