६ जेठ, काठमाडौं । इजरायलको हवाई आक्रमणले लेबनानको दक्षिणी भागमा कम्तीमा १९ जनाको मृत्यु भएको छ। लेबनानको स्वास्थ्य मन्त्रालयका अनुसार डेइर कानौन शहरमा तीन बालबालिका र तीन महिलासहित १० जना एउटै स्थानमा मारिएका छन्। त्यस्तै, नाबाटिएह र टायर जिल्लामा भएका आक्रमणमा थप नौ जनाको मृत्यु भएको र २९ जना घाइते भएका मन्त्रालयले जनाएको छ। अमेरिकाले लेबनान र इजरायलबीच जारी युद्धविरामलाई ४५ दिनका लागि थप गर्ने सहमति गर्दै घोषणा गरेको एक साता नपुग्दै यी घटना भएका हुन्।
युद्धविरामको अवधिमा पनि इजरायल र हिजबुल्लाहबीच मुख्यतः दक्षिणी लेबनान क्षेत्रमा लगातार गोली हानाहान भइरहेको छ। इजरायलले आक्रमणमा हिजबुल्लाहलाई मात्र लक्षित गरेको बताएको भए पनि महिला र बालबालिकासमेत सर्वसाधारण मारिने गरेका छन्। हिजबुल्लाहले पनि उत्तरी इजरायलका बस्तीहरू र दक्षिणी लेबनानका केही क्षेत्रहरूमा इजरायली सैनिकमाथि रकेट र ड्रोनमार्फत आक्रमण गरिरहेको जनाएको छ। मंगलबार हिजबुल्लाहको आक्रमणबाट एक इजरायली सैनिक मारिएका थिए।
इरान समर्थित शिया इस्लामवादी समूह हिजबुल्लाहले अमेरिकी–इजरायली हमला विरुद्ध प्रतिशोध स्वरूप इजरायलमाथि रकेट प्रहार गरेपछि मार्च २ मा लेबनान युद्धमा तानिएको थियो। अमेरिकी–इजरायली संयुक्त हमलामा इरानका सर्वोच्च नेता अलि खामेनी लगायतका शीर्ष नेताहरु मारिएका थिए। लेबनानको स्वास्थ्य मन्त्रालयका अनुसार मार्चयता जारी द्वन्द्वमा इजरायली आक्रमणहरुमा मृत्यु हुनेहरूको संख्या ३ हजार नाघेको छ। यसैबीच, हिजबुल्लाहले आफ्ना लडाकुले दक्षिणी लेबनानको हद्दाथा नगर क्षेत्रतर्फ अघि बढ्न खोजिरहेको र इजरायली सेनासँग भिडन्त जारी रहेको जनाएको छ। इरान समर्थित हिजबुल्लाहले आफ्ना लडाकुले एउटा इजरायली ट्यांक ध्वस्त पारेको दावी पनि गरेको छ। हिजबुल्लाहले दक्षिणी लेबनानमा इजरायली फौजमाथि र उत्तरी इजरायलको सीमा नजिकै रहेको ‘आइरन डोम’ हवाई प्रतिरक्षा प्रणालीमाथि पनि आक्रमण गरिएको जनाएको छ।
