वैदेशिक रोजगारीका लागि रोमानिया पठाइदिने भन्दै ठगी गरेको आरोपमा मोरङका म्यानपावर सञ्चालक उद्धव पाठक र सहयोगी अभि भण्डारी पक्राउ परेका छन्। उनीहरूविरुद्ध हालसम्म ९२ जनाले करिब साढे ३ करोड रुपैयाँ बिगो दाबीसहित इलाका प्रहरी कार्यालय सिजुवामा उजुरी दिएका छन्। पक्राउ परेकाहरूलाई अदालतले ६ दिन म्याद थप गरी आवश्यक अनुसन्धान थालिएको छ। २१ जेठ, विराटनगर।
वैदेशिक रोजगारी बन्दोबस्त गरिएको भन्दै सर्वसाधारणलाई ठगी गरेको आरोपमा मोरङ प्रहरीले म्यानपावर संचालक र कर्मचारीलाई पक्राउ गरेको हो। मोरङको रतुवामाई नगरपालिका–८ घर भएका ३७ वर्षीय उद्धव पाठक र रतुवामाई–९ का २५ वर्षीय अभि भण्डारी पक्राउ परेका छन्। भण्डारी, जो रतुवामाई–८ दाम्राभिट्टामा पाठकले सञ्चालन गरेको के एस ए नामक म्यानपावर कम्पनीको लेखापाल तथा एजेन्ट हुन्। ठगीको उजुरीपछि प्रहरीले पक्राउ गरी अनुसन्धान सुरु गरेको मोरङका प्रमुख जिल्ला अधिकारी युवराज कट्टेलले जानकारी दिएका छन्।
सोमबार साँझ पक्राउ परेका उनीहरूलाई इलाका प्रहरी कार्यालय सिजुवामा राखिएको छ। उजुरी दिने क्रम जारी रहेको प्रहरीले जनाएको छ। बुधबारसम्ममा ९२ जनाले करिब साढे ३ करोड रुपैयाँ बिगो दाबीसहित जिल्ला प्रहरी कार्यालय सिजुवामा उजुरी दिएका छन्। उजुरीको संख्या बढ्दै गएको छ। रतुवामाईमा म्यानपावर कम्पनी खोलेर पाठकले तीन सयभन्दा बढीलाई ठगेको प्रारम्भिक निष्कर्ष प्रहरीले निकालेको छ। प्रहरीले पाठक र भण्डारीविरुद्ध छ दिन म्याद थप गरी अनुसन्धान सुरु गरेको छ। पाठकले चार वर्षदेखि विदेश पठाउने भनी पैसा लिँदै मान्छे पठाएका थिएनन्। उनीविरुद्ध इलाका प्रहरी कार्यालय सिजुवा, उर्लाबारी, जिल्ला प्रहरी कार्यालय मोरङ र काठमाडौंमा उजुरी दर्ता भइसकेको छ। रोमानियामा बस्दै आएका पाठक करिब एक महिनाअघि मात्र नेपाल आएका थिए।
