चलचित्र निर्माता अविरल थापाले चलचित्र पत्रकारिताको वर्तमान अवस्थाबारे सामाजिक सञ्जालमा प्रश्न उठाएका छन्। उनका अनुसार, चलचित्र पत्रकारिता प्रचारभन्दा सत्य प्रस्तुतिमा केन्द्रित हुनुपर्ने देखिन्छ, तर अहिले बढी पब्लिसिटी हुँदै आएको छ। चलचित्र पत्रकार महासंघको दशौं महाधिवेशनमा नेतृत्वले पत्रकारिताको गुणस्तर सुधार र आत्मअनुशासनमा जोड दिनु पर्ने महत्वपूर्ण छ। अघिल्लो वर्ष फिल्म ‘भुठान’ रिलिजको क्रममा उनले सामाजिक सञ्जालमार्फत एउटा गम्भीर प्रश्न उठाएको थिए– ‘के नेपाली चलचित्र पत्रकारिता सही दिशामा अघि बढिरहेको छ ?’ चलचित्र रिलिजको संवेदनशील समयमा उनले सो प्रश्न उठाउनु आफैंमा महत्वपूर्ण थियो।
चलचित्र पत्रकारहरूको व्यवहार र गतिविधिबाट निराश भएका उनले यस्तो स्टाटस लेख्न पुगेका थिए। स्टाटस सार्वजनिक भएको केहि दिनमै लभिम मलमा सोही फिल्मको ट्रेलर रिलिज कार्यक्रम आयोजना गरिएको थियो। त्यहाँ उपस्थित केही पत्रकार, विशेष गरी युट्युबरहरूले असान्दर्भिक र अनावश्यक प्रश्नहरूले कार्यक्रमलाई असहज बनाएको देखियो। अविरल थापा फिल्म निर्माता मात्रै नभई पत्रकारिता पढाउने कलेज ‘पोलिगन’ का प्रिन्सिपल पनि हुन्। यस्ता पृष्ठभूमि भएका व्यक्तिलाई केही युट्युबरहरूले नै पत्रकारिता सिकाउने अवस्था देखिएको छ।
चलचित्र पत्रकारितामा भइरहेका पछिल्ला गतिविधिले एउटा गम्भीर प्रश्न उठाउँछ– हामी चलचित्र पत्रकारिता भन्छौं, के यो साँच्चिकै पत्रकारिता हो? वा पत्रकारिताको नाममा छुट्टै धन्दा चलिरहेको छ? सबैलाई भिडियो खिच्नुपर्ने, युट्युब र फेसबुकमा तुरुन्त अपलोड गरी भाइरल बनाउनु पर्ने, डलर कमाउनु पर्ने मानसिकता व्याप्त छ। यसले कलाकार र निर्मातालाई मात्र होइन, समग्र क्षेत्रमा विश्वसनीयतामा प्रश्न उठाउँछ। चलचित्र पत्रकारितामा आएको यो समस्याको ठूलो कारण संस्थागत कमजोरी पनि हो। चलचित्र पत्रकार संघ, जसले यो क्षेत्रलाई अगाडि बढाउनुपर्ने हो, आफैं प्रभावहीन देखिन्छ।
आज चलचित्र पत्रकार महासंघको दशौं महाधिवेशन हुँदैछ। नेतृत्व परिवर्तनको यो समयमा पद बाँडफाँड मात्र होइन, आत्ममूल्यांकन गर्ने, गल्ती स्वीकार्ने र नयाँ दिशा निर्धारित गर्ने अवसर पनि हो। प्रश्न यथावत छ– के नयाँ नेतृत्व यसलाई गम्भीरतापूर्वक लिन्छ? यदि साँच्चिकै परिवर्तन चाहियो भने सबैभन्दा पहिले आत्मअनुशासनबाट सुरु गर्नुपर्छ। पत्रकारिता सिक्नुपर्छ, बुझ्नुपर्छ र नियमित अभ्यास गर्नुपर्छ।
चलचित्र पत्रकारिता अझै मरेको छैन, तर गंभीर मोडमा उभिएको छ। अबको निर्णयले नै निर्धारण गर्नेछ– यो क्षेत्र पुनः गरिमामय हुनेछ वा भीडभाडको कोलाहलमा हराउँछ।
