राष्ट्रिय खेलकुद परिषद्ले अखिल नेपाल फुटबल संघको आर्थिक विषयमा छानबिन गर्न तीन सदस्यीय उपसमिति गठन गरेको छ। उपसमितिको संयोजक राखेपका कार्यकारी सदस्य कमल भट्टराई हुनुहुन्छ र समितिलाई सात दिनभित्र प्रतिवेदन बुझाउने समयसीमा तोकिएको छ। एन्फाको अर्ली इलेक्सन विवादपछि राखेपले एन्फालाई तीन महिनाका लागि निलम्बन गरेको थियो। छानबिन उपसमितिले निष्पक्ष प्रतिवेदन तयार गर्नेछ। ८ वैशाख, काठमाडौं।
अखिल नेपाल फुटबल संघ (एन्फा)को आर्थिक विषयमा छानबिन गर्न राष्ट्रिय खेलकुद परिषद (राखेप)ले मंगलबार छानबिन समिति गठन गरेको छ। मंगलबार बसेको राखेपको कार्यकारी समितिको बैठकले राखेपका कार्यकारी सदस्य कमल भट्टराईको संयोजकत्वमा तीन सदस्यीय छानबिन उपसमिति गठन गरेको छ। अख्तियार दुरुपयोग अनुसन्धान आयोगको पत्रका आधारमा युवा तथा खेलकुद मन्त्रालयको वैशाख ७ गते सोमबारको पत्र अनुसार राय पेश गर्न छानबिन उपसमिति गठन गरिएको राखेप सदस्यसचिव रामचरित्र मेहताले जानकारी दिनुभयो।
छानबिन समितिमा राखेपका लेखा अधिकृत टंकनाथ कँडेल र आपूर्ति तथा भण्डार शाखाका गोपीकृष्ण निरौला सदस्य रहेका छन्। समितिलाई सात दिनभित्र छानबिन गरेर प्रतिवेदन बुझाउने समयसीमा तोकिएको छ। एन्फाको आर्थिक नियमावली, कार्यविधि र विधान विपरित खरिद प्रक्रिया पारदर्शी नभएको र अनियमितता भएको भन्दै एन्फाविरुद्ध अख्तियारमा उजुरी परेको थियो।
छानबिन उपसमितिले उजुरीसँग सम्बन्धित आवश्यक कागजात अध्ययन गर्ने, उजुरीबारे सरोकारवाला पक्षहरूसँग समन्वय गरी प्रतिवेदन तयार गर्ने, विवरण तयार गर्दा प्रचलित नियम, कानुन र संघको विधानको आधारमा तयार गर्ने, तोकिएको समय भित्र छानबिन प्रतिवेदन पेश गर्ने तथा आफैंले बैठकको कार्यविधि निर्धारण गर्न सक्ने जिम्मेवारी पाएको छ। पछिल्लो समय राखेप र एन्फाबीच एन्फाको अर्ली इलेक्सन विषयमा विवाद हुँदा हाल नेपाली फुटबल नै संकटतर्फ धकेलिएको छ। एन्फाले राष्ट्रिय खेलकुद विकास ऐन विपरित अर्ली इलेक्सन गर्न खोजेपछि राखेपले चैत ११ गते एन्फालाई तीन महिनाका लागि निलम्बन गरेको थियो। यस विषयमा निष्पक्ष रुपमा छानबिन गरेर प्रतिवेदन बुझाउने छानबिन उपसमितिका संयोजक कमल भट्टराईले जानकारी दिनुभएको छ।
