नेपाली कथानक फिल्म ‘एलिफेन्ट्स इन द फग’ पहिलो पटक ७९औँ कान्स फिल्म महोत्सवको ‘अन सर्टेन रिगार्ड’ खण्डमा चयन भएको छ। यस फिल्ममा किन्नर समुदायकी अगुवा ‘पिरती’को कथा प्रस्तुत गरिएको छ, जसले छोरी खोज्न प्रेम र जिम्मेवारीबीचको द्वन्द्व सामना गर्नुपर्छ। निर्देशक अविनाशविक्रम शाहले फिल्मलाई इमानदारीपूर्वक तयार पारेको र दर्शकको प्रतिक्रिया जान्न उत्साहित रहेको बताएका छन्।
फिल्मका निर्माता अनुप पौडेलले भने, ‘सपना पूरा भएको जस्तो महसुस हुँदैछ।’ यो पहिलो पटक हो जब कुनै नेपाली कथानक फिल्म कान्समा चयन भएको हो। अविनाशविक्रम शाहले लेखन र निर्देशन गरेको यो फिल्म जंगलको बीचमा रहेको एक सानो नेपाली गाउँको कथा हो, जहाँ जंगली हात्तीहरू बसोबास गर्छन्। फिल्मले किन्नर समुदायकी अगुवा ‘पिरती’को जीवनको संघर्षलाई देखाउँछ।
शाहले भने, ‘यो धेरै वर्षको मेहनतको परिणाम हो। फिल्ममा ट्रान्स महिला आमाको कथा छ। दर्शकले पात्र र उनी प्रतिनिधित्व गर्ने समुदायलाई कसरी ग्रहण गर्छन् भन्नेबारे जान्न उत्साहित छु।’ सन् २०२२ मा शाह र पौडेल छोटो फिल्म ‘लोरी’ लिएर कान्स पुगेका थिए, जसले ‘स्पेशल मेन्सन’ पाएको थियो।
निर्माताले नेपालभर एलजीबीटीआईक्यू समुदायसँग काम गर्ने व्यक्तिहरूसँग सम्पर्क गरेर ट्रान्स कलाकार खोज्न झण्डै दुई वर्ष लागेको बताएका छन्। फिल्मको विश्व प्रिमियर पछि नेपालमा रिलिज गर्ने तयारी छ। निर्माता टोलीले अन्य अन्तर्राष्ट्रिय महोत्सवमा पनि लैजाने योजना बनाएको छ। शाह र पौडेलले नयाँ फिल्मकर्मीलाइ सन्देश दिएका छन्, ‘आफ्नो काम जारी राख्नुस्, इमानदार बन्नुस्।’
सम्बन्धित खबर
