राष्ट्रिय विपद् जोखिम न्यूनीकरण तथा व्यवस्थापन प्राधिकरणले जोखिमयुक्त सडकहरुमा सवारी आवगमन रोक्न र यात्रु तथा सवारीसाधनको सुरक्षा सुनिश्चित गर्न सबै जिल्ला प्रशासन कार्यालयहरूलाई निर्देशन दिएको छ। प्राधिकरणले जोखिमयुक्त स्थानमा सवारी आवगमन बन्दको अवज्ञा गर्ने चालक र सवारीधनीमाथि कारबाही गर्न निर्देशन दिएको छ।
सोमबार साँझ काभ्रेको रोशी खोलामा पानीको बहाव बढेपछि सम्भावित जोखिमलाई ध्यानमा राख्दै पाँचवटा सवारी सुरक्षाका साथ रोक्दा यात्रुहरू बाढीमा फसेका थिए। ती ८९ यात्रु सबैलाई सकुशल उद्धार गरिएको छ। केही चालकहरुको कारण यात्रुहरुको सुरक्षा सम्बन्धमा जटिल प्रश्न उठेपछि प्राधिकरणले स्थानीय अवस्था र सडक जोखिमको विश्लेषण गरी आवश्यकतानुसार सवारी आवागमन रोक्न निर्देशन दिएको प्राधिकरणका उपसचिव रामबहादुर केसीले जानकारी गराए। प्राधिकरणले जल तथा मौसम विज्ञान विभागको मौसम पूर्वानुमान र त्यसअनुसार जारी हुने पूर्वसूचना, चेतावनी तथा जानकारी पालना गर्न पनि अनुरोध गरेको छ।
