नेपाल उद्योग वाणिज्य महासंघको नेतृत्व चन्द्रप्रसाद ढकालबाट अञ्जन श्रेष्ठलाई हस्तान्तरण गरिएको छ। श्रेष्ठले आगामी तीन वर्षमा निजी क्षेत्र र सरकारबीचको सम्बन्ध पुनःपरिभाषित गर्दै नीति निर्माण प्रक्रियामा निजी क्षेत्रको आवाज प्रबल बनाउने प्रतिबद्धता व्यक्त गरेका छन्। ढकालको कार्यकालमा निजी क्षेत्रलाई विकास साझेदारको रूपमा स्थापित गर्न लगानीमैत्री वातावरण निर्माण र आर्थिक सुधार सुझाव आयोग गठन गरिएको थियो। २३ वैशाख, काठमाडौं।
देशभरिका ५ लाखभन्दा बढी उद्योगी–व्यवसायीहरू कुनै न कुनै रूपमा जोडिएका नेपाल उद्योग वाणिज्य महासंघको नेतृत्व हस्तान्तरण भएको छ। अर्थतन्त्रका उतारचढाव र चुनौतीहरूका बाबजुद पनि चन्द्रप्रसाद ढकालले सफल नेतृत्व प्रदान गर्दै महासंघको गम्भीर जिम्मेवारी अञ्जन श्रेष्ठको काँधमा सुम्पेका छन्। ढकालले पद त्याग्दा अर्थतन्त्रमा निराशाभन्दा अपेक्षा बढी र चुनौतीभन्दा अवसर बढी रहेको भरोसा दिएका छन्।
व्यवसायीहरूले लामो समयदेखि उठाइरहेकै नीतिगत अस्थिरताको मूल कारण राजनीतिक अस्थिरता रहेको छ। जनताले २१ फागुन २०८२ को निर्वाचनमार्फत देशमा दुई तिहाइको नजिक शक्तिशाली सरकार बनाउन राष्ट्रिय स्वतन्त्र पार्टी (रास्वपा) लाई जनमतले समर्थन पुर्याएका छन्। सोही सन्दर्भमा, स्वयं श्रेष्ठका अनुसार ‘अहिलेको तीन वर्षको अवधिमा शक्तिशाली सरकारसँग साझेदारी र सहयात्रा गर्नु निजी क्षेत्रको नेतृत्वको मुख्य उद्देश्य हुनेछ।’
नेपालको अर्थतन्त्रमा निजी क्षेत्रले अनुमानित ८२ प्रतिशत योगदान पुर्याइरहेको छ भने रोजगारीमा यसको हिस्सा ८६ प्रतिशत रहेको छ। उद्यमी–व्यवसायीको हित संरक्षण, मनोबल वृद्धि र अर्थतन्त्र विस्तारमा नयाँ नेतृत्वले सक्रिय भूमिका खेल्ने योजना रहेको श्रेष्ठले बताएका छन्। महासंघको ६०औँ वार्षिक साधारणसभाको अवसरमा भावी नेतृत्वका रूपमा श्रेष्ठले अर्थतन्त्रका अवसर र चुनौतीहरूको विश्लेषण गरेका थिए।
