छहारी र ओमकार ब्रान्डका तेलमा कम मात्रा राखिएको आरोपमा उद्योगी Vijay श्रेष्ठ पक्राउ

२४ वैशाख, काठमाडौं । सूर्यमुखी (सन फ्लावर) खानेतेलको प्याकेजिङ्ग गर्दा तोकिएको भन्दा कम मात्रा राखेर बिक्री गरेको आरोपमा एक उद्योगी पक्राउ परेका छन्। छहारी र ओमकार ब्रान्डका सूर्यमुखी तेल उत्पादन गर्ने कम्पनी ओमकार आयल इन्डस्ट्रिज प्रालिका सञ्चालक विजय श्रेष्ठलाई प्रहरीले पक्राउ गरेको छ। श्रेष्ठको कम्पनी ललितपुरको गोदावरी नगरपालिका–५, लेलेस्थित महादेव खोलामा रहेको छ।
नेपाल प्रहरीको काठमाडौं उपत्यका अपराध अनुसन्धान कार्यालयले श्रेष्ठसँगै ९०५ कार्टुन तेल पनि बरामद गरेको छ। प्रहरीका अनुसार, कम्पनीले उत्पादन गर्ने छहारी र ओमकार ब्रान्डका एक लिटर र आधा लिटरका सूर्यमुखी तेलमा तोकिएको मापदण्डभन्दा कम तौल राखेर प्याकेजिङ्ग गरी बिक्री वितरण गरेको विशेष सुचनाका आधारमा अनुसन्धान गरिएको छ।
अनुसन्धानका क्रममा तेलका प्याकेटहरू तोकिएको मापदण्डभन्दा कम तौल भएको फेला परेको प्रहरीले जनाएको छ। श्रेष्ठ र बरामद गरिएको तेलका कार्टुनसहित ठगी सम्बन्धी कसुरमा अनुसन्धान र आवश्यक कारबाहीको लागि यस विषयलाई जिल्ला प्रहरी परिसर ललितपुर पठाइएको अपराध अनुसन्धान कार्यालयका सूचना अधिकारी एसपी रामेश्वर कार्कीले जानकारी दिए।