समाचार सारांश शारदा नगरपालिकाले खैराबाङमा २५ करोड ४३ लाख रुपैयाँ लागतमा ठूलो सामुदायिक खानेपानी कार्यक्रम सञ्चालनमा ल्याएको छ। यस आयोजना अन्तर्गत वडा नं १, ११ र १२ का लगभग १ हजार २०० घरपरिवार र ५ हजार ५ सय नागरिकलाई सिधै घरमै पानी उपलब्ध गराइनेछ। पानीको अभावले विशेषगरी बालबालिका र ज्येष्ठ नागरिकमा असर पार्दै आएको थियो। यो योजना १८ महिनाभित्र सम्पन्न हुने अपेक्षा गरिएको छ। २६ वैशाख, काठमाडौं। सुन्दर पहाड र हरियाली जंगलले भरिएको धार्मिक दृष्टिले महत्त्वपूर्ण क्षेत्र हो खैराबाङ। तर यहाँका नागरिकले पुस्तौँदेखि पानीको अभाव भोग्दै आएका छन्। घण्टौं पैदल यात्रा गरी पँधेरो पुग्न बाध्य हुनुपर्ने अवस्था थियो। गर्मीयाममा पानीका मुहानहरू सुक्दै जाने र पानी आपूर्तिमा कमी आउँदा पालो कुर्नुपर्ने अवस्था अझै छ।
शारदा नगरपालिका-११, खैराबाङका सुकलाल थापाले पुस्तौँदेखि खानेपानीको समस्या भोगिरहेकामा दुःख व्यक्त गरेका छन्। पानीको लागि घण्टौं पैदल भिरको बाटो हुँदै पँधेरो पुग्नु पर्ने बाध्यता छ। वैशाख र जेठ महिनामा पानीका मुहानहरू झन् सुक्ने भएकाले पालो पर्खन पर्ने अवस्था रहेको उनले बताए। ‘हामीले पुस्तौँदेखि पानीको अभाव भोगिरहेछौं। मैले सम्झदा देखि पानी लिन थालेको हुँ, अहिले पनि समस्या यथावत् छ। घण्टौं पैदल भिरको बाटो हुँदै पँधेरो जानुपर्छ’, उनले भने, ‘वैशाख र जेठमा पानीका मुहानहरू सुक्दा पालो पर्खन निकै समय लाग्छ। सरसफाइ र सिँचाइ हाम्रो लागि अझै सपना जस्तै छ।’
सुकलाल जस्तै यहाँका सबै नागरिकलाई यही समस्या छ। पानी अभावका कारण सबैभन्दा बढी प्रभावित बालबालिका र ज्येष्ठ नागरिक हुन्। पानीको लागि समय खर्च हुँदा दैनिक जीवनका साथै शिक्षा र स्वास्थ्यमा पनि प्रभाव परेको छ। पानी अभावका कारण यहाँका धेरै नागरिक बसाइँसराइ गर्न बाध्य भएका छन्, स्थानीय वीरेन्द्र बस्नेतले बताएका छन्। अब यो समस्या अन्त्य हुने आशा सबैले व्यक्त गरेका छन्। शारदा नगरपालिकाले सुरु गरेको बृहत खैराबाङ सामुदायिक खानेपानी आयोजनाले यो आशा साकार गर्ने बाटो देखाएको छ। ‘धेरै मानिस पानी अभावको कारण बसाइँसराइ गरेर गएका छन्। वृद्ध र बालबालिकालाई बढी समस्या देखिएको छ’, उनले भने, ‘स्वास्थ्यमा असर पर्छ, बालबालिका पढाइमा समस्यामा पर्ने गरेको छ। हाल नगरपालिकाले नयाँ योजना सुरु गरेको छ, छिट्टै घर-घरमा पानी पुग्नेछ भन्ने विश्वास छ।’
२५ करोडको खानेपानी आयोजना शारदा नगरपालिकाले शारदा खोला किनारबाट लिफ्ट प्रविधिमार्फत् काकाकुल बस्ती सम्म पानी पुर्याउन बृहत खैराबाङ सामुदायिक खानेपानी आयोजना सुरु गरेको छ। यो आयोजना बस्तीबाट करिब २ किलोमिटर तलबाट पानी ल्याउने काम हो। नगरपालिकाका अनुसार कुल लागत २५ करोड ४३ लाख रुपैयाँ रहेको यस आयोजनाको ठेक्का रकम भ्याटसहित १७ करोड ८५ लाख ४९ हजार ८७५ रुपैयाँ छ। निर्माण कार्य ललितपुरस्थित एम कन्स्ट्रक्सनले २०७८ भदौ ७ गतेभित्र योजनाको सम्पन्नता गर्ने लक्ष्यसहित जिम्मेवारी लिएको छ। योजना सम्पन्न भएपछि वडा नं १, ११ र १२ का लगभग १ सय २०० घरपरिवार प्रत्यक्ष लाभान्वित हुने नगर प्रमुख प्रकाश भण्डारीले जानकारी दिनुभयो। नागरिकलाई खानेपानी अभाव नहोस् भन्ने उद्देश्यले नगरपालिकाले यस क्षेत्रलाई प्राथमिकतामा राखेर काम गरिरहेको छ। ‘घर घरमा सफा र स्वच्छ पानी उपलब्ध गराउने गरी २५ करोड ४३ लाखको लागतमा यो योजना अगाडि बढाइएको हो। योजना सम्पन्न भएपछि नगरपालिका १, ११ र १२ का १२०० घरपरिवारसहित ५ हजार ५ सय नागरिकले घरमै पानी पाउनेछन्’, उहाँले भन्नुभयो। १८ महिनाभित्र योजना पूरा गर्ने लक्ष्यसहित गुणस्तरीय निर्माण व्यवसायी हुँदा समयभन्दा पहिले योजना सम्पन्न हुने आशा गरिएको छ। शारदा नगरपालिकाका तीन वडाका लगभग १ हजार २०० घरपरिवारले दशकीय खानेपानी संकटको अन्त्य हुने विश्वास राखेका छन्। योजना समयमै सम्पन्न भए यहाँका नागरिकले पहिलो पटक सहज र सुरक्षित रूपमा घरमै खानेपानी पाउनेछन्।
