ललितपुर महानगरपालिका वडा नं। ३ को पहलमा पुलचोक बसस्टपमा करिब डेढ लाख रुपैयाँ लगानी गरी बसहरूको लाइभ लोकेसन देखाउने डिजिटल बोर्ड स्थापना गरिएको छ। हाल १४ सय बसमा जीपीएस जडान गरिएको छ र त्राभल नेपालको एपमार्फत यात्रुले आफ्नो बसको वास्तविक समय ट्रयाक गर्न सक्नेछन्। अन्य बसहरूमा जीपीएस जडान गर्ने कार्य जारी रहेको छ र सार्वजनिक यातायातलाई सहज बनाउन थप प्रयास भइरहेको छ, वडाध्यक्ष महर्जनले जानकारी दिए। ‘बस स्टपमै बसको लाइभ लोकेसन हेर्न सकिन्छ।’ ‘कतिवटा बस आउँदैछन् भनेर सजिलै थाहा पाइन्छ।’
पहिले बस स्टेसनमा पल्टिन बाध्य यात्रुहरूलाई यो कुरा विश्वास लाग्न सक्दैनथ्यो। तर तीन महिनादेखि यदि तपाईं ललितपुरको पुलचोक बसस्टपबाट यात्रा गर्दै हुनुहुन्छ भने एउटा डिजिटल बोर्ड देख्नुभएको होला जसले बसहरूको लाइभ लोकेसन देखाउँछ। साझा यातायात, नेपाल यातायात, रिद्धिसिद्धि यातायात, झरना यातायात, महानगर यातायात, दक्षिणकाली यातायात लगायत लगभग सबै बसहरूको लाइभ लोकेसन सो स्मार्ट बोर्डमा हेर्न सकिन्छ। यसले तपाईंलाई आफूले चढ्नुपर्ने बस कहिले र कहाँ आइपुगेको छ सजिलै थाहा दिन्छ।
ललितपुर महानगरपालिका वडा नं। ३ का वडाध्यक्ष श्री गोपाल महर्जनका अनुसार करिब २०/२१ दिनको मेहनत र करिब डेढ लाख लगानीमा यो काम सम्पन्न भएको हो। यसलाई अझ व्यवस्थित गर्न थप बसहरूमा जीपीएस जडान गरिनेछ, वडाध्यक्ष महर्जनले भने। ‘आफ्नो वडाभित्र पर्ने अन्य बस स्टपहरूमा पनि यस्तै व्यवस्था गरी यात्रुलाई सहज बनाउने अभियानमा लागिपरेको छु,’ उनले थपे, ‘ती बाटोहरूमा सधैं यात्रुहरु बस कुरिरहेका हुन्थे तर अनिश्चितताले तनाव हुन्थ्यो। त्यसैले यसको समाधानका लागि सोच्न थालेँ र यो उपाय अपनाइयो।’
त्राभल नेपालको सिओओ प्रमोस अधिकारीले भने, ‘अझै धेरै बसहरूमा जीपीएस जडान गरिनेछ। यसले यात्रुले सजिलै आफ्नो बस कहाँ पुगेको छ र कहाँ जाँदै छ सो थाहा पाउन सक्नेछन्।’ उनका अनुसार उक्त डिजिटल बोर्डले बसहरूको जीपीएस डाटा रियल–टाइममा प्राप्त गरेर बस नम्बर र संस्थाअनुसारको ब्रान्ड रङ देखाउँछ। यदि यात्रु पुलचोकमा पुगेका छैनन् भने पनि त्राभल नेपालको एपमार्फत बस ट्रयाक गर्न सकिन्छ। अधिकारीले भने, ‘बोर्डमा जे देखिन्छ, त्यही सबै एपमा पनि लाइभ हुन्छ। बस स्टप पुग्नुअघि एपमा जाँच गरेर जान सकिन्छ।’
वडाध्यक्ष महर्जनले भने, ‘हामी अहिले अन्य बसहरूलाई पनि यसमा जोड्ने तालिममा छौं। गाडी मालिकलाई आफ्नो गाडी कहाँ छ भन्ने जानकारी नहुँदा यो प्रणालीले ठूलो फाइदा पुर्याउनेछ,’ ‘यो केवल सुरुवात हो। हामी सार्वजनिक यातायातलाई अझ सहज बनाउन यस्ता काम अरू पनि गर्ने योजनामा छौं।’
तस्बिर/ भिडियो: आर्यन धिमाल
