२८ वैशाख, तुलसीपुर (दाङ) । तुलसीपुर उपमहानगरपालिका–७ की टीकाकुमारी सार्की पहिलेदेखि मात्र चुलोचौकामा सीमित थिइन्। उनको दिनचर्या घरायसी काममा मात्र सिमित थियो। तर, अहिले गुडिया बनाउन सिकेपछि उनको जीवनशैली नै परिवर्तन भएको छ। उनले भनिन्, ‘पहिले मैले घरमै बस्ने गर्थें र कुनै काम थिइन, तर अहिले गुडिया बनाउन थालेकी छु।’
त्यस्तैगरी, तुलसीपुर–६ की मीना लामिछाने अहिले अचार बनाउन व्यस्त छिन्। उनले घरमा उत्पादन भएका लसुन, खुर्सानी, पाँच, बोडी लगायतका सामग्रीबाट अचार बनाएर बिक्री गर्दैछन्। यी महिलाहरू उद्यमशीलतामा संलग्न भएका छन्। आम्दानीमा जोडिएपछि घर खर्च व्यवस्थापनमा समेत घरका अन्य सदस्यहरूसँग योगदान माग्नुपर्ने अवस्था सुधार भएको छ। लामिछानेले भनिन्, ‘पहिले केही खर्च लागेमा घरमा माग्नुपर्थ्यो, अब हामी आफैं आम्दानी गर्न सक्षम भएका छौं।’
यी महिलाहरू उदाहरण हुन्। अहिले तुलसीपुरका धेरै महिलाहरू पनि यस्तै प्रकारले आयआर्जनमा संलग्न भएका छन्। सेवा प्रतिष्ठान दाङको आयोजनामा र सामाजिक विकास डिभिजन कार्यालय तुलसीपुरको आर्थिक सहकार्यमा १५ दिने अचार उत्पादन तथा गुडिया निर्माण तालिम दिइएको थियो, जसले महिलाहरूलाई स्वरोजगारबाट आम्दानी गर्न सफल बनाएको छ। यो तालिम तुलसीपुरका ६, ७ र ९ नं वडाका महिलाहरूलाई प्रदान गरियो। सामाजिक विकास डिभिजन कार्यालय तुलसीपुरका प्रमुख गिरीराज पाण्डेले भने, ‘२५ जना अचार बनाउने र ४७ जना गुडिया बनाउने तालिम दिई महिलाहरूलाई आयआर्जनमा सक्रिय बनाएको छौं।’ उनका अनुसार महिलाहरूले ११ प्रकारका अचार र ९ प्रकारका गुडिया बनाउन सिकेका छन्। गुडियाको प्रशिक्षणमा खरायो, पाण्डा, गणेश, टायर कुशन, लभ कुशन, फलावर कुशन र चारकुने कुशन बनाउन सिकाइएको छ। अचार बनाउने तालिममा बोइलर अचार, मिक्स अचार, टिमुर अचार, बोडीको अचार, करेलाको अचार, कागतीको अचार, भागो छोप, मिक्स अचार, लसुन र अदुवाको अचार बनाउन सिकाइएको छ।
