२९ वैशाख, काठमाडौं । आज संघीय संसद अन्तर्गतका आठ वटा संसदीय समितिका बैठकहरू आयोजना हुँदैछन्। बिहान १० बजे अर्थ समितिको बैठकमा अर्थ मन्त्रालयका कामकारबाही र आगामी कार्ययोजना सम्बन्धमा छलफल गरिने कार्यक्रम रहेको छ। चालु आर्थिक वर्ष २०८२/८३ को बजेट कार्यान्वयन अवस्था र आगामी आर्थिक वर्ष २०८३/८४ को बजेट तयारीसम्बन्धी पनि छलफल हुनेछ।
बिहान साढे १० बजे उद्योग तथा वाणिज्य र श्रम तथा उपभोक्ता हित समितिको बैठकमा विषयगत उपसमिति गठनबारे छलफल हुनेछ। बिहान १० बजे पूर्वाधार विकास समितिको बैठकमा सडक सुरक्षा र मनसुनको समयमा सवारी व्यवस्थापनसम्बन्धी विषयमा छलफल हुने छ। बिहान ११ बजे महिला तथा सामाजिक मामिला समितिमा मधेशी आयोगका पदाधिकारीहरूसँग छलफल हुनेछ।
बिहान १० बजे शिक्षा, स्वास्थ्य तथा सूचना प्रविधि समितिको बैठक बस्नेछ, जहाँ शिक्षा, विज्ञान तथा प्रविधि मन्त्रालयको वर्तमान अवस्था र भावी कार्ययोजनाबारे छलफल गरिनेछ। बिहान ११ बजे सार्वजनिक लेखा समितिको बैठकमा समितिका सम्बन्धमा प्रस्तुतीकरण हुने तालिका रहेको छ। दिउँसो १ बजे सार्वजनिक नीति तथा प्रत्यायोजित विधायन समितिको बैठकमा भूमिहीन नागरिकहरूलाई अस्थायी रुपमा राखिएको होल्डिङ सेन्टरको अनुगमनबारे छलफल हुनेछ। बिहान ११ बजे संघीयता सबलीकरण तथा राष्ट्रिय सरोकार समितिको बैठकमा गण्डकी प्रदेशमा गरिएको स्थलगत अनुगमन र अन्तरक्रिया कार्यक्रमको प्रतिवेदनको मस्यौदामाथि छलफल हुनेछ।
