नेपाली कम्युनिस्ट पार्टीका सांसद रमेश मल्लले सल्यानमा विनाशकारी असिना र वर्षाले कृषकहरूलाई गम्भीर चोट पुर्याएको बताएका छन्। उनले बाढीले सयौं रोपनी खेत तथा फलफूलबाली नष्ट भएको र ग्रामीण संरचनामा ठूलो क्षति पुगेको जानकारी दिएका छन्। सांसद मल्लले तीन तहका सरकारलाई राहत, क्षतिपूर्ति र कृषि विमा कार्यान्वयनमा प्रभावकारी बनाउन आग्रह गरेका छन्।
२९ वैशाख, काठमाडौं। सांसद मल्लले किसानहरू बँदेल–बाँदरको अतिक्रमण तथा अतिवृष्टि र अनावृष्टिको मारमा परेको बताएका छन्। बुधबार प्रतिनिधि सभाको शून्य समयमा बोल्दै उनले सल्यानमा लगातार तीनपटक विनाशकारी असिनापानी र वर्षासहितको जलवायुजन्य प्रकोपले व्यवसायीक कृषिमाथि गम्भीर चोट पुर्याएको बताए।
उनका अनुसार गत शनिबार बागचौर नगरपालिका, छत्रेश्वरी र कपुरकोट गाउँपालिकासहितका क्षेत्रमा असिनापानी परेको थियो। त्यसपछि शारदा नदीमा आएको बाढीले सयौं रोपनी खेत बगाएको, पाकेको गहुँ, तरकारी तथा सुन्तला, आँप, लिची, ओखर, टिमुर, किवी, स्याउ लगायतका फलफूलबाली नष्ट भएको उनले जानकारी दिए।
उनका अनुसार ग्रामीण सडक, सिँचाइ कुलो, खानेपानी योजना र तटबन्ध संरचनाहरू ध्वस्त हुँदा जनजीवन निकै कष्टकर बनेको छ। तत्कालको लागि तीनै तहका सरकारको समन्वयमा पीडित किसान र क्षतिग्रस्त संरचनाको यथार्थ लागत संकलन गरी राहत, क्षतिपूर्ति र पुनःस्थापनाको व्यवस्था गर्न तथा कृषि विमा कार्यक्रमलाई प्रभावकारी बनाउन उनले सभामुखमार्फत सरकारको ध्यानाकर्षण गराए। ‘एकातिर बँदेल, बाँदर लगायत जंगली जनावरहरूको अतिक्रमण, अर्कोतिर अतिवृष्टि र अनावृष्टिको मारले किसानहरूमा आशा हराउँदै गएको छ,’ उनले भने, ‘यसमा सरकार बेखबर बन्दा राज्यप्रतिको भरोसा समेत कमजोर बनेको छ। सरकारले अभिभावकको भूमिका निभाएर पीडितहरूको घाउमा मल्हम लगाओस्।
