हुम्लाको सामाजिक विकास कार्यालयले ताजाँकोट गाउँपालिका-३ स्थित बानादेव आधारभूत विद्यालयका २३ बालबालिकालाई विभिन्न शैक्षिक सामग्री उपलब्ध गराएको छ। एक समाचार प्रकाशनपछि विद्यार्थीहरूले बोरा झोलामा किताब बोकेर विद्यालय जानुपर्ने बाध्यता हटेको विद्यालयका प्रधानाध्यापक खडकबहादुर सिंहले बताए। स्थानीय अगुवा जोखे बुढाले सञ्चारमाध्यमले उठाएको विषयमा सरकारी निकायले छिटो चासो देखाएकोमा खुशी व्यक्त गरे। मिति २९ वैशाख, हुम्ला।
हुम्लाको दुर्गम ताजाँकोट गाउँपालिका-३ को बानादेव आधारभूत विद्यालयका २३ जना विद्यार्थीलाई सामाजिक विकास कार्यालयले नयाँ शैक्षिक सामग्री प्रदान गरेको हो। गत १३ वैशाखमा ‘दुर्गमका दुख: बोराका झोलामा किताब-कापी’ शीर्षकमा प्रकाशित समाचारपछि सामाजिक विकास कार्यालय हुम्लाले विद्यार्थीहरूलाई विद्यालयको पोशाक, झोला, सुइटर, ट्र्याक सुट, जुत्ता र अन्य आवश्यक शैक्षिक सामाग्री उपलब्ध गराएको हो। अब विद्यार्थीहरूले बोरा र साधारण कपडाका झोलामा किताब–कापी बोकेर विद्यालय जानुपर्ने बाध्यता हटेको, विद्यालयका प्रधानाध्यापक खडकबहादुर सिंहले जानकारी दिनुभयो।
प्रधानाध्यापक सिंहका अनुसार विद्यालयमा अध्ययनरत अधिकांश विद्यार्थीहरू आर्थिक रूपमा गरिब परिवारका हुन्। शैक्षिक सामग्री अभावका कारण उनीहरूले नियमित पढाइमा कठिनाइ भोग्नु परेको थियो। सहयोग प्राप्त भएपछि विद्यार्थीहरूमा नयाँ उत्साह थपिएको उनले बताए। स्थानीय अगुवा जोखे बुढाले सञ्चारमाध्यमले उठाएको विषयमा सरकारी निकायले छिटो चासो देखाउँदै सहयोग उपलब्ध गराएकोमा खुशी व्यक्त गरे।
दुर्गम जिल्लाका साना समस्याहरू समयमै बाहिर नआए बालबालिका प्रत्यक्ष प्रभावित हुने भएकाले यस्ता विषय निरन्तर उजागर हुनुपर्ने उनको भनाइ छ। दुर्गमका बालबालिकाको पीडा समाचारमार्फत सार्वजनिक भएपछि छोटो समयमा सहयोग जुट्नु सञ्चारमाध्यमको प्रभाव र सामाजिक उत्तरदायित्वको उत्कृष्ट उदाहरण रहेको स्थानीयहरूले बताएका छन्।
