नेपाल प्रहरीको साइबर ब्यूरोले सामाजिक सञ्जालमार्फत कक्षा १२ को प्रश्नपत्र र उत्तर सार्वजनिक गर्ने दुई जनालाई पक्राउ गरेको छ। पक्राउ पर्नेहरूमा निराजन शाही र प्रेमकुमार श्रेष्ठ रहेका छन्, जसलाई काठमाडौंबाटै चाबहिलमा पक्राउ गरिएको हो। उनीहरूलाई विद्युतीय कारोबार ऐन, २०६३ अन्तर्गत चारदिन म्याद थप गरी अनुसन्धान भइरहेको छ। २९ वैशाख, काठमाडौं।
साइबर ब्यूरोको टोलीले परीक्षा सुरु हुनुअघि प्रश्नपत्र र उत्तर सार्वजनिक गर्ने कार्यमा संलग्न दुई जनालाई पक्राउ गरी आज सार्वजनिक गरेको छ। पक्राउ पर्नेहरु सुर्खेतको वीरेन्द्रनगर नगरपालिका-८ घर भएका र हाल काठमाडौँ महानगरपालिका-३२, सुविधानगर बस्ने ३७ वर्षीय निराजन शाही तथा धादिङको नीलकण्ठ नगरपालिका-३ घर भएका र हाल काठमाडौँ बूढानीलकण्ठ नगरपालिका-१०, कपन बस्ने ३० वर्षीय प्रेमकुमार श्रेष्ठ रहेका छन्। साइबर ब्यूरोका प्रवक्ता तथा प्रहरी उपरीक्षक दिलीपकुमार गिरीले जानकारी दिएका छन्।
राष्ट्रिय परीक्षा बोर्डद्वारा सञ्चालन गरिएको कक्षा १२ को प्रश्नपत्र परीक्षा सुरु हुनुअघि केही समयमै प्रश्नपत्र बाहिरिएको विषयमा आवश्यक अनुसन्धानका लागि राष्ट्रिय परीक्षा बोर्डबाट यो पत्र साइबर ब्यूरोमा प्राप्त भई प्राविधिक विश्लेषण र अनुसन्धान पश्चात प्राप्त तथ्य अनुसार, कक्षा १२ व्यवस्थापन विषयका मात्रै भएको ‘वाट्सएप ग्रुप’ र ‘फेसबुक मेसेन्जर’ लगायत विभिन्न ग्रुपहरूमा उत्तरसहित प्रश्नपत्र बाहिर ल्याई यसको गोपनीयता भङ्ग गर्ने कार्यमा उनीहरू संलग्न भएको आरोपमा पक्राउ गरिएको छ, प्रवक्ता गिरीले बताए।
