‘नेपाल र बंगलादेशमा सरकार परिवर्तन गरेर देखाएका छन्, यहाँ मन्त्रीहरु फेरिन समेत सक्दैनन्?’

३० वैशाख, काठमाडौं । आम आदमी पार्टीका संयोजक र दिल्लीका पूर्वमुख्यमन्त्री अरविन्द केजरीवालले बुधबार भारतका जेनजि युवाहरुलाई राष्ट्रिय योग्यता प्रवेश परीक्षाको प्रश्नपत्र चुहावट प्रकरणमा जवाफदेहिता माग्न आह्वान गरेका छन्। उनले युवाहरुमाझ राजनीतिक परिवर्तन गर्ने शक्ति रहेको भन्दै नेपाल र बंगलादेशमा सत्ता परिवर्तनको उदाहरण प्रस्तुत गरेका छन्। पत्रकार सम्मेलनमा सम्बोधन गर्दै केजरीवालले परीक्षाको तयारी गरिरहेका विद्यार्थीहरुको आत्मविश्वास प्रश्नपत्र चुहावटका निरन्तर घटनाले कमजोर पारेको बताए। उनले जेनजि युवाहरुलाई प्रश्नपत्र बाहिरिएको घटनामा संलग्न व्यक्तिहरुको विरुद्ध सडकमा उत्रिन आग्रह गरे।

‘यदि बंगलादेश र नेपाल जस्ता देशका जेनजि युवाहरुले सरकार परिवर्तन गर्न सक्छन् भने, भारतीय युवाहरुले पनि प्रश्नपत्र चुहावट घटनामा जवाफदेहिता सुनिश्चित गर्न सक्छन्‘, उनले भने। केजरीवालले यसअघि केन्द्रीय अनुसन्धान ब्युरोले गरेका अनुसन्धानहरुको प्रभावकारितामा प्रश्न उठाउँदै दोषीहरूले कहिल्यै कडा सजाय पाएका छन् कि छैनन्? भन्ने प्रश्न गरे। ‘२०१४ मा मोदी सरकार सत्तामा आएपछि परीक्षाका प्रश्नपत्र चुहावटका ९३ घटना भएका छन्। अधिकांश घटनाहरू बीजेपी सरकार रहेका राज्यहरूमा भएका छन्’, केजरीवालले जोड दिए, ‘यसले ६ करोड युवाहरुलाई असर गरेको छ। राजस्थान, उत्तर प्रदेश, उत्तराखण्ड र गुजरातमा यस्ता घटनाहरु धेरै भएका छन्। यी राज्यहरूमा र केन्द्रमा बीजेपी सरकार हुनु संयोग मात्र होइन।‘

केजरीवालले हालै परीक्षाका प्रश्नपत्र बाहिरिएको र त्यसको केन्द्र राजस्थान भएकोले यसमा नेताहरु नै संलग्न छन् कि भन्ने शंका उठाएको बताए। ‘यदि त्यसो हो भने केन्द्रीय अनुसन्धान ब्युरो के गर्न सक्छ? म जेनजि युवाहरुलाई सोध्न चाहन्छु, के यो जारी रहिरहनु पर्छ?’ केजरीवालले भने। उनले नेपाल र बंगलादेशको आन्दोलनको उदाहरण दिँदै जेनजि युवाहरुलाई विरोधमा उत्रिन आह्वान गरे। ‘यदि नेपाल र बंगलादेशका जेनजि युवाहरु सडकमा उत्रिएर सरकार परिवर्तन गर्न सक्छन् भने, के हाम्रो जेनजिले प्रश्नपत्र चुहावटमा संलग्न मन्त्रीहरु जेल पठाउन सक्दैनन्? मलाई तपाईंहरुमाथि पूर्ण विश्वास छ’, उनले भने। ‘यसमा संलग्नहरुलाई दोषी ठहर गर, जेल पठाऊ, सडकमा उत्र, विरोध गर र यो घृणित खेल बन्द गर।’ केजरीवालले प्रश्नपत्र प्रकरणमा भइरहेको केन्द्रीय अनुसन्धान ब्युरोको जाँच अनुसन्धानबाट कुनै अर्थपूर्ण नतिजा नआउने आरोप पनि लगाए। ‘अघिल्ला प्रश्नपत्र चुहावट घटनामा ब्युरोले केही गर्न सकेन,’ उनले भने। २०१४ पछि भएका विभिन्न परीक्षाका कथित प्रश्नपत्र चुहावट घटनाहरु उल्लेख गर्दै उनले यस्ता घटनाले देशभरका करोडौं विद्यार्थीहरुको भविष्य प्रभावित भएको बताए।