बेलायतको सत्तारूढ लेबर पार्टीका चार मन्त्रीहरूले राजीनामा दिएका छन् भने ८७ सांसदहरूले प्रधानमन्त्री सर किअर स्टारमरलाई पद छोड्न दबाब दिएका छन्। भर्खरै सम्पन्न स्थानीय निर्वाचनमा लेबर पार्टी ठूलो क्षति व्यहोरिसकेको अवस्थामा दक्षिणपन्थी रिफर्म यूके पार्टीले अप्रत्याशित सफलता हासिल गरेको छ। प्रधानमन्त्री स्टारमरले पदमा कायम रहने वाचा गरेका छन् भने ११२ लेबर सांसदहरूले उनको समर्थन जनाएका छन्। ३० वैशाख, लन्डन।
बेलायती राजनीतिक अवस्था अहिले उच्च अस्थिरतामै पुगेको छ। दुई वर्षअघि भारी बहुमतसहित सत्ता सम्हालेका लेबर नेता सर किअर स्टारमरमाथि प्रधानमन्त्री पदबाट राजीनामा दिन दबाब तीव्र हुँदै गर्दा चार मन्त्रीहरूले पदबाट राजीनामा दिएका हुन्। सत्तारूढ पार्टीका ४०३ जना सांसदमध्ये ८७ जनाले तत्काल राजीनामा दिन वा राजीनामाको समय निर्धारण गर्न आग्रह गरिसकेका छन्। मंगलबार जेस फिलिप्स, मियाट्टा फाह्नबुलेह, एलेक्स डेभिस-जोन्स र जुबिर अहमद मन्त्रीहरू पदबाट राजीनामा दिएका थिए।
फिलिप्सले वर्तमान नेतृत्वमा सचिवीय पदमा सेवा दिन नसकिने बताउँदै स्टारमरलाई राजीनामा दिन आग्रह गरिन् र भनिन, ‘प्रगतिको अवसरहरू रोकिएका र ढिलाइ भएको देखेर म थाकिसकेको छु।’ राजा चार्ल्स तृतीयले अर्को संसदीय सत्रको उद्घाटन गर्दै सरकारका योजनाहरूको रूपरेखा प्रस्तुत गर्ने दिनअगाडि यी राजनीतिक घटनाक्रमहरू भएका हुन्। गत साता (७ मे) इङ्ल्याण्डको स्थानीय तह र स्कटल्यान्ड तथा वेल्सका राष्ट्रिय संसद निर्वाचनहरूमा लेबर पार्टीले ठूलो क्षति बेहोरेपछि पार्टीभित्र असन्तुष्टि व्यापक रुपमा बढेको छ।
